Aqtóbedegi qarjy pıramıdasyna qatysty qylmystyq is: 50 kúdikti anyqtalǵan
AQTÓBE. QazAqparat – Aqtóbede «Garant 24 lombard», «Estate lombard», «Vygodnyı zaım» jáne «Nýr-Alı Kapıtal» qarjy pıramıdalaryna qatysty qylmystyq isti tergeý aıaqtaldy. Qazir talapkerler tergeý materıalymen tanysyp jatyr, dep habarlaıdy QazAqparat tilshisi.
ІІM Jedel tergeý toby «Garant 24 lombard», «Estate lombard», «Vygodnyı zaım» jáne «Nýr-Alı Kapıtal» JShS-niń basshylaryna qatysty qarjy pıramıdasyn qurý faktisi boıynsha sotqa deıingi tergep-tekserýdi aıaqtady . Qylmystyq is materıaldary taraptarǵa berildi.
«Qylmystyq is boıynsha jábirlenýshi jáne azamattyq talapker bolyp tanylǵan barlyq azamat qylmystyq is materıalymen tanysý úshin Aqtóbe qalasy aǵaıyndy Jubanovtar kóshesi 271A, mekenjaıy boıynsha Aqtóbe oblystyq polıtsııa departamentine jumys kúnderi saǵat 09:00 - 18:30 deıin kele alady. Qosymsha aqparat alý úshin 8 (7132) 936186 telefon nomeri boıynsha habarlasýǵa bolady. Bul iste jábirlenýshiler kóp. Іspen tanysý 2 aıǵa sozylýy múmkin», - dedi oblystyq polıtsııa departamenti baspasóz qyzmetiniń jetekshisi Erbolat Sarqulov.
Qylmystyq is boıynsha 50 kúdikti anyqtaldy. Olardyń 33-i sottyń sanktsııasymen qamaýǵa alyndy. Al beseýi úı qamaǵynda otyr. 12 kúdikti eshqaıda ketpeý týraly qolhatpen jiberildi. Budan basqa 6 kúdiktige izdeý jarııalanyp, olarǵa qatysty qylmystyq is bólek tergelip jatyr. Kúdiktilerdin qylmystyq is-áreketteri Qylmystyq kodekstiń «Qarjylyq (ınvestıtsııalyq) pıramıdany qurý jáne oǵan basshylyq etý», «Uıymdasqan toppen zańsyz banktik qyzmetpen aınalysý», «Uıymdasqan top qurý jáne oǵan basshylyq etý, «Uıymdasqan topqa qatysý» jáne «Uıymdasqan toppen asa iri mólsherde alaıaqtyq jasaý» babymen saralanǵan.
