Aqtóbedegi qarttar úıi áleýmettik jeli arqyly syn aıtqan turǵyndy sotqa berdi

AQTÓBE. QazAqparat - Aqtóbe oblystyq qarttar men múgedekter ınternat úıi áleýmettik jeli arqyly qarttar úıiniń tamaǵy nashar, al jumysshylar qarııalardyń kıim-keshegin urlaıdy degen aqparat taratqan Nadejda Ivannıkovany sotqa berdi. Internet úıi moraldyq shyǵyndy qaıyrymdylyq qoryna aýdarmaq, dep habarlaıdy QazAqparat tilshisi.

Aqtóbedegi qarttar men múgedekter úıinde 239 adam bar. Olardyń teń jartysy múgedek, ózgesi jasy kelip, boıynan qaýqary ketken qarııalar.

Aqtóbe oblystyq qarttar men múgedekter ınternat úıi dırektorynyń mindetin atqarýshy Bolat Isaevtyń aıtýynsha, zeınetaqynyń 70 paıyzy arnaıy qorǵa jınalyp, saqtalady, qajetti zattarǵa jumsalatyndyǵy týraly buıryqtan soń ınternettan 40 adam ketip, balalaryna oralǵan.

«Internat úıinde jatatyn adamdardyń týǵan-týystary, balalary zeınetaqy beretin kezde keledi. Sondaı bir kúni keshki asqa kartop ezbesi men qýyrylǵan balyq berilgen. Eger qarttar úıiniń turǵyny tóseginen tura almasa, ashanaǵa bara almasa, tamaqty bólmelerine aparady. Qasyq ustaı almaıtyndardy qyzmetkerler tamaqtandyrady. Olar bir mezgilde bárine tamaq berip úlgermeýi de múmkin. Sol kezde sýretke túsirip, áleýmettik jelige salyp jiberdi. Sotqa berdik. Eger ol óz áreketin rastaǵysy kelse ınternat úıiniń qyzmetkerlerin shaqyryp, surap, sebebin bilýi kerek edi. Tipti qarttardy baǵyp-qaǵatyn adamdardy urlyq jasaıdy dep aıyptaǵan. Bar bolǵany 32 myń teńge aılyq alatyn adamdarǵa kúıe jaǵýǵa bolmaıdy. Basshyny jamandap, jumysymyzǵa qarsylyq kórsetsin, biraq qarapaıym qyzmetkerdi kinálaǵany qynjyltady»,- dedi Bolat Isaev.
 

Internat úıi moraldyq shyǵyn retinde 300 myń teńge talap etip otyr. Bul qarjy óndirilse, ınternat úıi ony qaıyrymdylyq qoryna aýdarmaq.

«Bul aqsha úshin jazylǵan aryz emes. Jastar oılanýy tıis. Sotqa aryzdy olar jaýapkershilikti sezinse degen oımen túsirdik. Kimde-kim qarttar men múgedekter qalaı turyp jatqanyn kórip, bilgisi kelse ınternatqa kelsin, jumysqa alamyn. Olar kúni-túni jumys istep, janynda júrse, jumystyń jaýapkershiligi mol ekenin biler edi. Unamady dep aıtý ońaı, pikir bildirý jeńil»,- dedi Bolat Isaev.

Aıta keteıik, aqtóbelik turǵyn kartop ezbesi men balyq salynǵan keshki asty sýretke túsirip, áleýmettik jeli arqyly taratqan bolatyn. «Mynaý keshki as. Nan, shaı, qasyq, shanyshqy, maılyq joq. Ne aıtasyzdar? Bul bassyzdyqty bireý baqylaı ma? Qashan qarttarǵa tolyqqandy jaǵdaı jasalady? Qazir zeınetaqynyń 70 paıyzyn alyp otyr... Zeınetaqy mólsheri de artty»,- dep óz oıyn qaldyrǵan Nadejda Ivannıkova zhalobnaya_kniga_aktobe akkaýntynda.

Sot sheshimdi dúısenbi kúni shyǵaratyny kútilýde.