Aqtóbedegi ındýstrıaldyq aımaqqa ınvestorlardyń qyzyǵýshylyǵy artty
Aqtóbedegi ındýstrıaldyq aımaqtyń aýmaǵy 200 gektardy quraıdy. Munda gaz, sý, elektr toǵy men tas jol, temir jol bar. Ári ındýstrıaldy aımaq «Batys Qytaı - Batys Eýropa» halyqaralyq dálizinde ornalasqan. Tek ınvestorlar daıyn jobany usynyp, qurylys jumystaryn tez arada bastaýy tıis.
«Aqtóbe» áleýmettik-kásipkerlik korporatsııasynyń dırektory Darhan Ótemistiń aıtýynsha, qazir 13 kompanııa óz jobasyn usyndy. Eki zaýyt iske qosyldy. Onyń biri kólik dóńgelekterinen sport, balalardyń oıyn alańdaryna arnalǵan jasandy jabyndy shyǵarý zaýyty, ekinshisi áınek jýatyn suıyqtyq jáne antıfrız óndiretin kásiporyn. Barlyǵy 1,3 mıllıard teńge ınvestıtsııa salyndy. Qazir 50 adam turaqty jumys istep júr.
«Indýstrıaldyq aımaqta «Jedel plıýs» JShS jobasy iske asyrylyp jatyr. Qazirgi kezde qural-jabdyq jetkizilip, iske qosý jumystaryn júrgizile bastady. Keshen qarasha aıynda iske qosylady. Sonymen qatar, qysh taqtaıshalar, saýda jáne medıtsına salasyna asa qajetti polıetılen buıymdary shyǵarylady. Barlyǵy 9,5 mıllıard teńge ınvestıtsııa salynatyn 6 jobanyń qurylysy júrip jatyr. Taǵy tórt jobanyń tehnıkalyq-ekonomıkalyq negizdemesi jasalady. Óńirdegi gaz tapshylyǵy máselesin túbegeıli sheshý úshin «GazEksport» JShS ındýstrııaldyq aımaqqa shaqyryp otyrmyz. Suıytylǵan gazdy saqtaýǵa arnalǵan joba iske assa 400 tonna otyn turatyn jer belgilenedi»,- dedi «Aqtóbe» áleýmettik-kásipkerlik korporatsııasynyń dırektory Darhan Ótemis.
Qurylys jumystary kezinde nemis tehnologııasy qoldanylady. Qaýipsizdik erejeleri eskerilip, ekologııalyq talaptarǵa saı gazdy saqtaý jumystary júrgiziledi. Eger joba iske assa gaz taratýshylar suıytylǵan otynnyń baǵasyn jergilikti ákimdikpen kelisip, bekitedi. Kompanııa óz erkimen gaz baǵasyn ósire almaıdy. Bul aldyn-ala kelisilgen memorandýmda qarastyrylǵan ekijaqty talap.
Aıta keteıik, «Aqtóbe» ındýstrıaldyq aımaǵy jyl basynan beri 137 mıllıon teńge tabys túsirdi. Bul ótken jyldyń sáıkes kezeńimen salystyrǵanda úsh ese kóp. Ári memlekettik-jekeshelik seriktestik jobasyna 20 saraptama júrgizip, ındýstrıalyq aımaq mamandary 34 mıllıon teńge paıda tapty.
