Aqtóbedegi hrom óndirisine 73 mıllıard teńge ınvestıtsııa salynady
AQTÓBE. QazAqparat - Aqtóbe oblysynyń ákimi Berdibek Saparbaev búgin ferroqorytpa zaýyty, Dóń ken baıytý kombınatynyń jumysshylarymen kezdesti, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev iri óndiris oryndarynyń eńbek ujymymen kezdesip jatyr. Bul joly Aqtóbe ferroqorytpa zaýyty men Dóń ken baıytý kombınaty jumysshylarymen kezdesip, eńbek kelisimshartynyń oryndalýyn tyńdady. Jıynǵa Eýrazııalyq top dırektorlar keńesiniń tóraǵasy Aleksandr Mashkevıch qatysty.
«Investıtsııa kóp bolsa, ekonomıkaǵa jaqsy áser etedi. 73 mıllıard teńge óte jaqsy kórsetkish. Bul ınvestıtsııa jańa jumys oryndaryn ashýǵa múmkindik beredi. Bıyl ortasha jalaqy 207 myń teńgege jetedi. Bastysy - jumysshylardy qysqartýǵa bolmaıdy»,- dedi oblys ákimi Berdibek Saparbaev.
«Qazhrom» TUK» AQ prezıdenti Vıktor Tıldiń aıtýynsha, Aqtóbe ferroqorytpa zaýytynyń №4 tsehy ótken jyly 250 myń tonna ónim óndirdi. Bıyl taǵy 80 myń tonnaǵa arttyrady. Jospar boıynsha Aqtóbe ferroqorytpa zaýytyndaǵy №4 tseh tolyq qýattylyqta jumys isteýi tıis. Bul Eýrazııalyq top dırektorlar keńesiniń tóraǵasy Aleksandr Mashkevıchtiń tapsyrmasy.
«Álem boıynsha sapaly ónimge suranys joǵary. Sondyqtan ken óndirý kólemin arttyrý qajet. Іske qosylǵan №4 tseh tolyq qýattylyqta jumys isteýi kerek. Ári óndiristi tsıfrlandyrý tapsyrmasy qoıyldy. Oılanyńyzdar, aqyldasyp, utymdy sheshim qabyldańyzdar. Biz óndiristi jańa deńgeıge kóterýimiz kerek»,- dedi Aleksandr Mashkevıch.
