Aqtóbedegi gaz quıý stantsııalary arnaıy qujaty joq kólikterge qyzmet kórsetpeıdi
AQTÓBE. QazAqparat - Aqtóbedegi gaz quıý beketteri arnaıy qujaty bar, gazben júretin qurylǵy úshin ruqsat alǵan júrgizýshilerge ǵana qyzmet kórsetedi, dep habarlaıdy QazAqparat tilshisi.
Aqtóbede gaz tapshylyǵyn joıý baǵytynda jumys júrip jatyr. Buǵan deıin habarlaǵanymyzdaı, oblys ákim Berdibek Saparbaev arnaıy jumys toby qurylyp, tekserý júrgiziletinin málimdegen bolatyn. Qazirgi kúni qaladaǵy gaz quıý stantsııalarynda arnaıy habarlama ilýli tur. Endi kóligin gazǵa aýystyrǵan júrgizýshiler arnaıy qujatyn kórsetýge mindetti. Al eger kólik tirkelmese, gaz quıýǵa shekteý qoıylady.
«Aqtóbe oblysy boıynsha 37 myńnan astam kólik gazben júredi. Jeltoqsan aıyna 9 myń tonna gaz bólindi. Gaz temirjol, avtojol arqyly jetkizilip jatyr. Táýligine óńir kólikterine 350 tonna qajet dep eseptegende jyl sońynda tapshylyq qaıta sezilýi múmkin. Sondyqtan gaz jetkizýshiler tek arnaıy ruqsat qaǵazy bar, jol polıtsııasyna tirkelgen kólikterge ǵana qyzmet kórsetý aktsııasyn qolǵa aldy. Al tirkelmegen kólikterge gaz berilmeıdi. Biz osy aktsııany ótkizýge májbúr bolyp otyrmyz», - dedi Aqtóbedegi gaz tasymaldaýyshylar qaýymdastyǵy tóraǵasynyń orynbasary Altynaı Muhanova.
Áleýmettik jelini baqylap otyrǵan qaýymdastyq ókilderi talapqa qarsy shyqqan júrgizýshilerdiń tirkelmegenin aıtyp otyr.
«Biz osy talapqa qarsy shyǵyp otyrǵan júrgizýshilerge kómektesýdi josparlap otyrmyz. Eger gazben júretin kóliktiń naqty sany belgili bolsa, biz Energetıka mınıstrligine suranys berip, gaz kólemin arttyra alamyz. Bizge kóliktiń naqty sany kerek», - dedi A.Muhanova.
Aıta keteıik, gaz tek arnaıy esepke alynǵan, jol polıtsııasyna tirkelgen kólik ıelerine beriledi. Bul aktsııa eki aıǵa sozylady.
