Aqtóbedegi Eset batyr kesenesine aparatyn jol jóndeýden ótti
Qazaqstannyń kıeli jerler geografııasy qataryna engen Eset batyr kesenesi Alǵa aýdanynyń Bestamaq aýylynda ornalasqan. Munda jyl saıyn júzdegen adam kelip, zııarat etedi. Munda shyraqshyǵa arnalǵan úı men qonaq kútýge arnalǵan oryn, ashana salyndy.
«2013 jyly Bestamaq aýyldyq okrýgindegi Eset batyr Kókiulynyń kesenesi janynan jańa memorıaldyq keshen halyq ıgiligine paıdalanýǵa berildi. Oǵan oblystyq bıýdjetten 144,5 mıllıonteńge bólindi. Memorıaldyq keshende mýzeı, namazhana,180 oryndyq zal, 12 oryndyq VIP zal, as úıi bar. Negizi Eset batyr kesheni kelýshiler men batyrǵa taǵzym etýshilerdiń qaıyrymdylyq kómegimen turǵyzylyp, kútim jasalyp otyr. 2008 jyly «Eset batyr memorıaldyq kesheni» memlekettik kommýnaldyq kásiporyny quryldy. Bul maqsatta bıýdjetten qarjy qarastyrylmaǵan. Keshen tarıhı eskertkish retinde tirkelip, týrıstik marshrýt baǵdarlamasyna engizilgen. Elek ózeni arqyly kesenege ótetin jerge kópir turǵyzylǵan. 2017 jyly «Kroýn Plıýs» JShS-niń dırektory Asylbek Saljanovtyń demeýshiligimen jalpy quny 1,5 mıllıon teńgege Elek ózeni arqyly ótetin kópirdiń tireýi aýystyryldy. Sondaı-aq, kesenege barar jolǵa «AqtóbeGorDorStroı» JShS-niń dırektory Ashat Aıtjanovtyń demeýshiligimen jalpy quny 8 mıllıon teńgege jóndeý jumystary júrgizildi»,- dedi Alǵa aýdanynyń ákimi Naǵymjan Aldııarov.
Al bıyl «Týǵan jerge taǵzym» kishi baǵdarlamasy aıasynda «Alǵajolsıstems» JShS kompanııasynyń dırektory Konstantın Boshkovtyń jəne «DSS Trans» JShS-niń dırektory Arman Bıtegenovtiń demeýshiligimen jalpy quny 20 mıllıon teńgege Eset batyr Kókiuly memorıaldyq kesheniniń aýmaǵyna asfalt tóseldi. Sonymen qatar, «Parıjskaıa Kommýna» JShS-i 8 mıllıon teńge bólip, as berýge arnalǵan kúrke saldy.
«Eset batyrdyń 350 jyldyǵyna oraı Alǵa aýdanynyń syıly azamattarynyń biri «Aktep» JShS-niń basshysy Nurlan Saǵynalın 32 mıllıon teńge qarajy bólip, Bestamaq aýylynyń kiri berisine batyrdyń monýment eskertkishi ornatyldy. Eskertkishtiń aınalasy abbattandyryldy. Eskertkishtiń bıiktigi - 11,5 metr. Eset batyr memorıaldyq kesheniniń aldynda «Babek-Qurylys» JShS-niń dırektory Rahıp Azızovtiń demeýshilik kómegimen jalpy quny 15 mıllıon teńgege qaqpa men qorshaý qurylysy júrgizildi. Demeýshilerdiń kómegimen eki jyl buryn shyraqshylarǵa jáne kelýshilerge arnalǵan kesenege jóndeý jumystary júrgizilgen bolatyn»,- dedi aýdan ákimi.
