Aqtóbedegi emdeý mekemelerine 220 ottegi kontsentratory tabystaldy
AQTÓBE. QazAqparat – Aqtóbede «Shaniraq Aqtobe» jáne «Shuǵyla» qoǵamdyq qorlary 220 ottegi kontsentratoryn tartý etti, dep habarlaıdy QazAqparat tilshisi.
«Shaniraq Aqtobe» jáne «Shuǵyla» qoǵamdyq qorlary birigip, «Owgels» ottegi kontsentratorynyń 220 danasyn Aqtóbe oblysynyń 19 aýrýhanasyna tabystady.
«Qarjyny qarapaıym adamdar, kásipkerler jınady. Aqtóbe oblysyna berilgen ottegi kontsentratory óńir qajettiligin tolyq óteýge jetedi dep eseptep otyrmyz. Buǵan deıin de eriktiler aýrýhanalarǵa kómektesti. Al emdeý mekemeleri bizge óz qajettilikteri týraly aıtyp berdi», - dedi qoǵamdyq qor quryltaıshysy Edil Aımaǵambetov.
Aıta keteıik, ottegi kontsentratory Qytaı zaýytynan tikeleı jetkizildi. Tasymaldaýǵa elimizdiń Densaýlyq saqtaý mınıstrligi qoldaý kórsetti. Qazaqstanǵa ákelingen 1 myń dana apparattyń 220-sy Aqtóbege bólindi.
«Qazirgi kezde koronavırýs pen pnevmanııaǵa shaldyqqandar sany azaıdy. Provızorlyq, ınfektsııalyq statsıonarlardyń 30-40 paıyzynda ǵana emdelýshiler bar. Barlyǵy 3 myń kereýettiń 1 myńynda naýqastar jatyr. Bul jumyla jumys istegenniń nátıjesi dep bilemiz. Búgin qoǵamdyq qor emdeý mekemelerine jańa ottegi apparatyn jetkizdi. Kóbin aýdandarǵa jiberip jatyrmyz. Ottegi kontsentratorymen qamtamasyz etý zańdylyǵan súıensek, óńirge 684 apparat qajet. Osy joly qajettilik 100 paıyz óteldi», - dedi oblystyq densaýlyq saqtaý basqarmasynyń basshysy Samat Danııarov.
