Aqtóbedegi Elek ózenine 46 myńnan astam shabaq jiberildi
AQTÓBE. QazAqparat - Aqtóbedegi Elek ózenine 46 290 shabaq jiberildi. Balyqtandyrý jumysyna 3,9 mıllıon teńge jumsalǵan, dep habarlaıdy QazAqparat tilshisi.
Aqtóbedegi Elek ózenine shabaq jiberý jumysy «Qazhrom» Transulttyq kompanııasy» AQ-ǵa júktelgen. Metallýrgter jyl saıyn ózendi balyqtandyrý jumystaryn júrgizip keledi. Bıyl 46 myńnan astam shabaq ózenge jiberildi. Shabaq balyq ósirýdi qolǵa alǵan sharýashylyqta arnaıy baptaldy.
«Metallýrgter úsh jyldan beri Aqtóbedegi Elek ózenin balyqtandyrýǵa úles qosyp keledi. Bıyl zaýyt ákimshiligi 3,9 mıllıon teńge bólip, «Ardaǵym» sharýa qojalyǵynan tez kóbeıetin tuqy balyqty satyp alýǵa tapsyrys berdi. Keıin shabaq Elek ózenine jiberildi. Kóktemde biz zaýyt aýmaǵyn abattandyryp, kógaldandyramyz. Aǵash otyrǵyzyp, ekologııalyq máselelerdi ońtaıly sheshý jolynda eńbek etemiz»,- dedi zaýyttyń energetıkalyq qamtamasyz etý basqarmasynyń ınjener-energetıgi Oralhan Qaýmetov.
Aıta keteıik, zaýyt ótken jyly da 46 myńnan astam tuqy balyǵynyń shabaǵyn Elek ózenine jiberdi.
