Aqtóbedegi din atyn jamylyp, qylmysqa barǵandar isimen quqyq qorǵaý organdar aınalysqany jón - Bas múftı
ALMATY. 25 shilde. QazAqparat /Ádilet Musahaev/ - Aqtóbede bolǵan oqıǵa jaıynda resmı aqparattar berildi, biz ol jóninde surastyryp kórdik. Din atyn jamylǵandar - munaı urlaýshylar, qylmyskerler osyndaı jaǵdaıǵa bardy degen maǵlumat berildi.
Sondyqtan onymen prokýratýra, quqyq qorǵaý organdary aınalysqany jón. Bul jaıynda búgin Qazaqstan musylmandary dinı basqarmasy men Orta Azııa múftıler keńesiniń tóraǵasy, Bas múftı Sheıh Ábsattar Qajy Derbisáli Almatyda arnaıy ótken baspasóz máslıhatynda aıtty.
«Bizdiń ımamdar adam balasyna qol jumsaý, qııanat jasaý úlken kúná ekendigi jaıynda barlyq ýaqyttarda aıtyp júredi. Sonaý 2001 jylǵy Amerıkada bolǵan oqıǵadan keıin sál birdeńe bolsa ıslamǵa jala jaba jóneledi. Islam ondaı isterdiń barlyǵyna qarsy. Adamdy óltirýge emes, halyqty yntymaqtastyqqa, birlikke shaqyratyn din. Sondyqtan oryn alǵan keleńsizdikterdiń barlyǵyn dinmenen baılanystyra berýdiń jóni joq. Barlyq álemdik dinder jurtqa qyldaı qııanat jasaýdy qoshtamaıdy", -deıdi Bas múftı.
Sonymen qatar ol Aqtóbedegi bas ımamnyń aýystyrylýy jaıyna toqtalyp ótti. "Aqtóbedegi ımam onda oryn alǵan keleńsizdikke deıin aýystyrylǵan bolatyn. Bizde ár bes jyl saıyn oblystardaǵy ımamdardy aýystyryp otyratyn ratotsııa bar. Mine, osy sebepti bıyl 16 aımaqtaǵy 10 bas ımam aýystyrylǵan edi", -deıdi ol.
