Aqtóbedegi daýyl shyǵyndaryn esepteıtin komıssııa quryldy
AQTÓBE. QazAqparat - Aqtóbedegi daýyldan keıin qalalyq ákimdik janynan arnaıy komıssııa quryldy. Qazirgi ýaqytta shyǵyndy esepteý jumystary júrgizilip jatyr, dep habarlaıdy QazAqparat tilshisi.
Aqtóbe qalasynda keshe daýyl bolyp, Batys-2 aýdanyndaǵy 9 qabatty úıdiń 3 balkonyn qıratyp ketken bolatyn. Qazirgi ýaqytta qalalyq ákimdik janynan arnaıy komıssııa quryldy. Komıssııa tóraǵasy qala ákiminiń orynbasary Naǵymjan Aldııarov. Onyń aıtýynsha, kran qulap, balkony qıraǵan páterlerdi tótenshe jaǵdaılar qyzmeti qarap, qorytyndy jasaıdy.
«Daýyldan keıin kommýnaldyq mekemeler kúsheıtilgen tártipte jumysqa kóshti. Batys-2 yqsham aýdanynda kran qulaǵanyn bárimiz bilemiz. Qazirgi ýaqytta qalpyna keltirýge arnalǵan joba ázirlenip jatyr. Terezeler salynady. Sonymen qatar, daýyldan keıingi shyǵyndy esepteýge arnaıy komıssııa quryldy. Shyǵyn tolyq óteledi», - dedi N. Aldııarov.
Aıta keteıik, daýyldan keıin qalalyq ákimdikke 21 aryz túsken. Olardyń kóbi qulaǵan aǵashtardy kesý, qoqysty jınaýǵa ótinish bergen. Aryz jazǵandar arasynda búlingen kóliginiń shyǵynyn óteý týraly ótinish bergen adam joq.
«Komıssııa tekserip, qorytyndy jasalǵan soń akt daıyndalady. Sol sheshimmen kelgen shyǵyn óteledi. Biraq jańa páter alyp berý týraly sóz qozǵalyp jatqan joq», - dedi qala ákiminiń orynbasary.
Qazirgi ýaqytta qurylys kompanııasy tereze salý jumystaryn bastady. «Aqtóbe sáýlet» kompanııanyń proraby Serik Satınovtyń aıtýynsha, úsh kún ishinde balkondar tolyq qalpyna keltiriledi.
