Aqtóbedegi daý-damaı máıittik donorǵa kesirin tıgizdi
AQTÓBE. QazAqparat - Elimizde máıittik donor turalap qaldy. Aqtóbe oblystyq densaýlyq saqtaý basqarmasynyń basshysy Áset Qalıevtiń aıtýynsha, óńirdegi sot protsesinen soń adamdar da, dárigerler de qorqyp qalǵan, dep habarlaıdy QazAqparat tilshisi.
Aqtóbe oblysy boıynsha 320 adam búırek, 54 adam baýyr aýystyrý otasyn qajet etedi. Adam ómirin saqtap qalýdyń bir joly ota bolǵanymen, qazaqstandyqtar sońǵy ýaqytta máıittik donor bolýǵa kelisim berer emes. Aqtóbede bolǵan sot protsesinen soń dárigerlerde ruqsat almaı-aq ota jasaýǵa quqyqtary bolǵanymen, táýekelge bara almaı otyr.
«Donor bolýǵa týma-týystary kelispeıdi, keliskeni sáıkes kelmeı qalady. Sondyqtan máıittik donorlyqty damytý kerek. Aqtóbelik dárigerler alty adamnyń búıregin máıittik donordyń kómegimen aýystyrdy. Al Aqtóbedegi shýdan soń múlde toqtap qaldy. Birneshe aıdan beri birde-bir máıittik donor bolmady. Dárigerler de qorqyp qalǵan. Qarapaıym adamdar máıittik donorǵa kelisim bermeı jatyr. Bul jerde biz buqaralyq aqparat quraldary arqyly máıittik donordy damytýymyz kerek»,- dedi Áset Qalıev. Bul tek Aqtóbede emes, búkil Qazaqstandaǵy jaǵdaı.
Aıta keteıik, aqtóbelik dárigerler búırek aýystyrý otasyn ózderi jasaıdy. Al baýyr aýystyrý otasyn kúni búginge deıin koreıalyq áriptesterimen birge atqardy. Dárigerler bıyl bul belesti de baǵyndyrady.
«Adamnyń búıregin, baýyryn aýystyrý otasyn jasaý úshin koreıalyq dárigerlerdiń kómegine júgindik. Qazirgi kezde óz dárigerlerimiz búırek aýystyrý otasyn jasap júr. Bıyl baýyrdy da óz kúshimizben aýystyrýdy bastaımyz. Óte kúrdeli ota bolǵan soń naýqastyń emes, donordyń da ómirine jaýaptymyz»,- dedi Aqtóbe oblystyq densaýlyq saqtaý basqarmasynyń basshysy Áset Qalıev.
