Aqtóbedegi dala órtinen mert bolǵan ákimniń 4 balasy jetim qaldy
AQTÓBE. QazAqparat - Aqtóbe oblysy, Áıteke bı aýdany, Sulýkól aýyly mańyndaǵy órtti sóndirý kezinde qaza bolǵan ákimniń artynda tórt balasy qaldy. Al áleýmettik pedagog Joldybek Ábdisálimovtyń eki balasy bar, dep habarlaıdy QazAqparat tilshisi.
Aqtóbe oblysy, Áıteke bı aýdany, Sulýkól aýylynda dala órtin sóndirip júrgen kezde denesin kúıik shalyp, oqıǵa ornynda qaza bolǵan aýyl ákimi Batyrbek Birlepesov pen aýrýhanada kóz jumǵan Joldybek Ábdisálimov týraly buǵan deıin habarlaǵan bolatynbyz. Aýdan ákimdigi qazir marqumdardy aqtyq saparǵa shyǵaryp salý rásimin uıymdastyryp jatyr.
«Batyrbek Birlepesov 1976 jyly týǵan. Bilimi joǵary. Ártúrli salada jumys istedi. 2015 jyldan beri Sulýkól aýyldyq okrýginiń ákimi qyzmetin atqardy. Onyń tórt balasy bar. Al Joldybek Ábdisálimov 1978 jyly týǵan. Arnaýly orta bilimdi. 2013 jyldyń naýryz aıynan bastap Sulýkól orta mektebinde áleýmettik pedagog bolyp jumys istegen. Otbasyly, artynda eki balasy qaldy. Qaza bolǵandardyń sadaqasyn jasap, jergeý rásimin uıymdastyramyz. «Azamattyq qorǵaý týraly» Zańyna súıene otyryp kómek kórsetemiz. Qazirgi kúni aýyl turǵyndary, aqsaqaldar jınalyp, týystaryna kóńil aıttyq. Kómek kórsetilip jatyr»,- dedi Áıteke bı aýdany ákiminiń orynbasary Temirbek Rahmetov.
Sondaı-aq osy órt oqıǵasynan denesin kúıik shalǵan eki adam aýrýhanada em qabyldap jatyr.
«Atalǵan aýylda bolǵan órt kezinde úsh adam aýrýhanaǵa jetkizildi. Onyń bireýi qaza boldy. Qazirgi kúni eki aýyl turǵyny em qabyldap jatyr. Negizi Áıteke bı aýdanynyń Áıke aýylynan 15 adam 3 tehnıka, Aqtastydan 6 adam úsh tehnıka, Sulýkól aýylynan 5 adam bir tehnıka órt sóndirýge qatysty. Órt sóndirýge eriktiler shyqty. №7 jedel órt sóndirý bóliminen 9 adam jumyldyryldy. QR «Azamattyq qorǵaý týraly» Zańynyń «Órtterdi sóndirý» baby boıynsha memlekettik órtke qarsy qyzmet bólimsheleri joq aýyldardaǵy dalalyq órtterdi jergilikti atqarýshy organdar sónidirýge mindetti. Zańǵa sáıkes jergilikti atqarýshy bılik eriktilerdi daıyndaıdy, oqytady, arnaıy jaýyngerlik kıimmen jabdyqtaıdy»,- dedi Aqtóbe oblystyq TJD baspasóz jetekshisi Dınara Atraýbaeva.
