Aqtóbedegi daǵdarys ortalyǵy bir kún de jumys istemeı jabylyp qaldy
AQTÓBE. QazAqparat - Aqtóbe qalasynda daǵdarys ortalyǵy ashylǵanymen, bir kún de jumys istemeı, qaıta jabyldy, dep habarlaıdy QazAqparat tilshisi.
Aqtóbe qalasyndaǵy daǵdarys ortalyǵyn ashý úshin metsenat Asqarbek Mamyrbaev 300 mıllıon teńgesin jumsady. Jospar boıynsha bul ortalyqta 130 adam túrli áleýmettik, quqyqtyq kómek alyp, jumys isteýge múmkindik beriletin edi. Sonymen qatar, balalar oınaıtyn, uıyqtaıtyn, tamaq ishetin alańdary arnaıy qarastyrylǵan. Memlekettik-jekeshelik seriktestik aıasynda túgel jabdyqtalyp, lentasy qıylǵan ortalyq bir jyl ótkenimen iske qosylmady.
«Daǵdarys ortalyǵy ashylǵan joq. Problemalar bolyp, ashylmaı qaldy. Biz bul ortalyqtyń jumysyn birjola toqtattyq»,- dedi metsenat Asqarbek Mamyrbaev.
Aıta keteıik, bul ortalyq 2016 jyldyń jeltoqsan aıynda resmı túrde ashyldy. Sol kúni kúıeýinen zábir kórgen, sharshap-shaldyqqan áıelder men balalarǵa pana bolatyn ortalyqta terapevt, psıhologtar jumys isteıdi dep josparlandy. Aqtóbe oblystyq ІІD men Aqtóbe qalalyq jumyspen qamtý jáne áleýmettik baǵdarlamalar bólimimen, jergilikti ákimdik birlese áıelderge kómek berýi tıis bolatyn. Biraq ortalyq sol kúıi bos tur. 
