Aqtóbedegi birqatar qurylystyń keshigýine materıaldardyń shet elden jetkizilýi sebep boldy - maman
AQTÓBE. QazAqparat - Aqtóbe oblysy ekonomıkasynyń 6 paıyzy qurylysqa tıesili. Bul salany odan ári damytý úshin qurylys kompanııalary men qurylys materıaldaryn óndirýshi kásiporyndary qaýymdastyq qurý týraly sheshimge keldi, dep habarlaıdy «QazAqparat» tilshisi.
Aqtóbe oblysynyń ákimi Berdibek Saparbaev Aqtóbe qalasynda qurylysy toqtap turǵan 14 nysannyń máselesin kóterip, tehnıkalyq, avtorlyq qadaǵalaýshylardyń jumysyn synǵa alǵan bolatyn. Synnan soń oblystyq kásipkerler palatasy qurylys kompanııalary men qurylys materıaldaryn shyǵaratyn óndiris oryndarynyń ókilderin jınap aldy. Ortaq alańda qurylysty sapaly júrgizýge, der kezinde aıaqtaýǵa qatysty máseleler qaraldy. Uzaq jyldar boıy osy salada eńbek etip kele jatqan qadaǵalaýshy Ǵıbat Qydyralınniń aıtýynsha, nysannyń der kezinde tapsyrylmaýyna merdigerler kináli.
«Qurylys kompanııalary baǵaǵa qaraıdy. Qazir olar Qytaı, Reseı, Belorýssııaǵa tapsyrys berip jatyr. Ol jaqta santehnıka, jıhazdar men elektr stantsııasyna qajetti quraldar, kabel symdar arzan. Biraq tapsyrys bergen kezde 45 kún dep belgilep, ony umytyp ketedi. Sóıtip, qajetti qurylys materıaly 90 kúnge deıin keshigedi. Máselen, Aqtóbe qalasynda kópqabatty jataqhana qurylysy belgilengen merzimde aıaqtalmaı tur. Sebebi, qajetti zattary keshigip jatyr», - dedi «Nısan-Aqtóbe» JShS dırektory Ǵıbat Qydyralın
Sonymen qatar, qurylysta avtorlyq, tehnıkalyq qadaǵalaý jetkilikti júrgizilmeıdi. Áriptesteriniń qateligin moıyndaǵan tehnıkalyq qadaǵalaýshy aldaǵy ýaqytta bul synnan nátıje shyǵady dep otyr.
«Tehnıkalyq qadaǵalaýshylar aptasyna eki ret qurylys basyna barady. Bizdiń keıbir áriptesterimiz óz mindetterine salǵyrt qarap, qurylysty qadaǵalamaıdy. Ony moıyndaımyz jáne aldaǵy ýaqytta qatelik jibermeýge tyrysamyz», - deıdi Ǵ.Qydyralın.
Aqtóbe ekonomıkasynyń 6 paıyzyn quraıtyn qurylysta bir qaraǵanda ósim bar. Biraq, ótken jyldardyń mejesi oryndalmaı keledi. Oǵan jer teliminiń tapshylyǵy, qurylys materıaldarynyń sapasy men qunynyń qymbattaýy sebep. Óndirýshi kompanııalar taýaryn ótkizýde qıyndyqqa tap bolady. Baǵa básekelestikke qabiletti emes, jergilikti jerde qymbat bolsa, Qytaı men Reseı, Belorýssııa arzan ónim usynady. Qurylys materıaldaryn shyǵarýshylarǵa qoldaý qajet. Jergilikti qurylys kompanııalary, bılik qoldaý kórsetpese jabylyp qalýy múmkin. Al arzanǵa júgirip, shetelge tapsyrys berip jatqandar naryqta baǵanyń basty orynda ekenin jasyrmaıdy. Búgin eki tarap toqtamǵa kelip, ortaq sheshim qabyldaý alańyn qurýǵa kelisti. Aqtóbede qurylysshylar qaýymdastyǵy qurylatyn boldy.
Altynaı Saǵyndyqova
