Aqtóbedegi balalardy qoldaý ortalyǵynan órt shyqty
AQTÓBE. QazAqparat - Aqtóbe qalasyndaǵy «Aıala» balalardy qoldaý ortalyǵynan órt shyqty, dep habarlaıdy QazAqparat tilshisi TJK baspasóz qyzmetine silteme jasap.
«3 mamyr kúni saǵat 12.42 shamasynda Aqtóbe qalasynyń «101» pýltine Avıaqalashyq aýdanynda ornalasqan, ómirdiń qıyn jaǵdaıyna tap bolǵan «Aıala» balalardy qoldaý ortalyǵynyń qos qabatty ǵımaratynan órt shyqqany týraly habarlama tústi», - dep habarlaıdy komıtetten.
Ortalyqtaǵy bólmelerdiń birinde jıhaz, matrastar órtenip, tilsiz jaý dálizge shaýyp, jalpy aýmaǵy 28 sharshy metrdi sharpyǵan. Órt sóndirýshiler kelgenge deıin 23 adam ózdiginen qaýipsiz jerge kóshirildi. Onyń segizi - balalar.
«Saǵat 13.08 kezinde órt sóndirý qyzmetkerleri iske kirisip, saǵat 13.16-da tilsiz jaý tolyq aýyzdyqtaldy. Zardap shekkender men kóz jumǵandar joq. Qazirgi ýaqytta órttiń shyǵý sebebi anyqtalyp jatyr. Órtti sóndirýge Aqtóbe oblystyq TJD jeke quramynan 56 adam men 11 arnaıy tehnıka jumyldyryldy», - dep habarlaıdy komıtetten.
