Aqtóbedegi balabaqshalarǵa planshet beriledi
AQTÓBE. QazAqparat - Aqtóbede «Baqytty bala» jobasy aıasynda balabaqshalarǵa planshet satyp alynady. Jańa tehnologııany engizýge 325,7 mıllıon teńge qarjy jumsalady, dep habarlaıdy QazAqparat tilshisi.
Jobadaǵy «Balalardyń ІT álemi» baǵyty aıasynda 4460 planshet satyp alynady. Planshetter oblystaǵy 331 balabaqshaǵa úlestiriledi. Shamamen ár planshettiń quny 70 myń teńgege jýyq bolady. Sonymen qatar, jyl sońyna deıin balabaqshalar men mektepterge elektrondy kitap, proektor, robottyq tehnıka, ZD prınteri satyp alynady.
«Planshet balabaqshaǵa beriledi. Balalar da ony paıdalanady. Qazirgi kezde balabaqshalardy memlekettik standart aıasynda ınteraktıvti taqta, planshet qoldanylady», - dedi Aqtóbe oblystyq bilim basqarmasynyń basshysy Lázzat Orazbaeva.
Uıymdastyrýshylar balalardyń telefon, planshet qoldanýy zaman talabyna saı dep otyr.
«Planshet, uıaly telefonnyń óz paıdasy bar. Aqyl-oıdy damytatyn anımatsııalyq mýltfılmderi de qaraýǵa bolady. Bastysy - durys baǵyt berý. Zaman talabyna saı balalar jańa tehnologııany meńgerýi qajet»,- dedi Aqtóbe oblysy ákiminiń orynbasary Erbol Nurǵalıev.
Aıta keteıik, barlyǵy 137 mektepke qajetti 3D prınterin satyp alýǵa 61,6 mıllıon teńge bólindi. Jalpy bilim salasyn jańa tehnologııamen qamtamasyz etý úshin 981 mıllıon teńgeden astam qarjy jumsalady. Onyń 168 mıllıon teńgesi bıýdjetten tys qarjy.
