Aqtóbedegi avtobýs órti: Jábirlenýshiler eń aýyr jaza taǵaıyndaýdy surady
AQTÓBE. QazAqparat - Aqtóbede avtobýs órtine qatysty sot otyrysy jalǵasty. Qaza bolǵan ózbekstandyqtardyń ata-anasy aıyptalýshylarǵa eń aýyr jaza surady, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda aıyptalýshy Qyrǵyzbaev, Pernebekov, Tanatov, Perdebaev, Tilepbaevqa qatysty is qaralyp jatyr. Sot otyrysy Aqtóbe jáne Túrkistan oblysy arasynda beınebaılanys arqyly jalǵasty. Buǵan deıin ár jábirlenýshi óz quqyqyn ózi qorǵasa, bul joly ózbekstandyqtar qorǵaýshy jaldady.
"Men sottalýshylardy tanymaımyn, arazdyǵym joq. Biz áli de balalarymyzdyń, týystarymyzdyń ólgenine senbeımiz, qolymyzda DNQ saraptama qorytyndysy joq. Ózim balam men inimnen aıyryldym. Olar bir úıdiń asyraýshysy bolǵan soń aıyptalýshylarǵa eń aýyr jaza taǵaıyndaýdy suraımyz. Aldaǵy ýaqytta moraldyq jáne materıaldyq shyǵyndy anyqtap, jetkizemiz",- dedi jábirlenýshi A. Hasanshaev.
Aıta keteıik, sot otyrysy kezinde ózbekstandyqtar avtobýs órtinen tiri qalǵan kýágerlermen kezdespegenin, sóılespegenin jetkizdi. Al prokýror Osman Orynbasaruly eki ózbekstandyq kýágerden jaýap alynbaǵanyn málimdedi.
Eske salsaq, Aqtóbede avtobýs órtine qatysty sot otyrysy ótip jatyr. Qazir 11 jábirlenýshiden jaýap alyna bastady. Alǵashynda jábirlenýshiler Aqtóbege kelgenimen, keıin olar Túrkistan oblysyna ǵana bara alatynyn málimdedi.
