Aqtóbedegi avtobýs órti: Sot otyrysy endi Yrǵyzda ótpeıdi
AQTÓBE. QazAqparat - Ózbekstan azamattary janyp ketken avtobýs órtine qatysty sot otyrysy Aqtóbe qalasynda ótedi, dep habarlaıdy QazAqparat tilshisi.
Yrǵyz aýdany Aqtóbe qalasynan 450 shaqyrym qashyqtyqta bolǵan soń qorǵaýshylar negizgi sot otyrysynyń oblys ortalyǵyna aýystyrylýyn suraǵan bolatyn. Yrǵyz aýdandyq soty ótinishti qanaǵattandyrmaı, qorǵaýshylar oblystyq sotqa appelıatsııalyq shaǵym túsirdi. Búgin oblystyq sottyń appelıatsııalyq quramy sheshim shyǵardy.
«Oqıǵa Yrǵyz aýdanynda bolǵanymen, tergeý jumystary Aqtóbe qalasynda ótti. Sonymen qatar, kúdiktilerdi ustaý, olardy qamaýǵa alý týraly sheshimdi №2 Aqtóbe qalalyq soty shyǵardy. Osy derekterge súıenip, isti Aqtóbe qalasynda qaraýdy suraımyz»,- dedi qorǵaýshy Nurjamal Ájiǵalıeva.
Al qorǵaýshy Haırolla Álmaǵambetov sot Yrǵyz aýdanynda ótse jábirlenýshiler men kýágerlerdiń, aıyptalýshylardyń qatynasy qıyndap, jatyn oryn úlken máselege aınalatynyn jetkizdi.
«Sot otyrysyna Ózbekstannan 100-den astam adam, Shymkent men Qyzylordadan kýágerler men jábirlenýshiler keledi. Yrǵyzda qonaq úı joq, qatynas ta qıyn. Tek taksı arqyly barýǵa týra keledi. Sondyqtan sot otyrysy ótetin oryndy Aqtóbe qalasyna aýystyrýdy suraımyz»,- dedi ol.
Aıta keteıik, appelııatsııalyq sot alqasy qorǵaýshylardyń ótinishin qanaǵattandyrǵan joq. Degenmen sýdıanyń oblys ortalyǵyna qatynaýyna múmkindik berdi.
«Yrǵyz aýdandyq sotynyń sheshimi ózgerissiz qaldyryldy. Biraq sot otyrysy Aqtóbe qalasynda ótedi. Biz sýdıanyń Aqtóbe qalasyna kelip, osy jerdegi sot ǵımaratynda isti qaraýyna jaǵdaı jasaımyz»,- dedi appelıatsııalyq sot alqasynyń tóraǵasy Elemesov.
