Aqtóbedegi avtobýs órti: Kompanııanyń dırektory bárinen beıhabar bolyp shyqty
AQTÓBE. QazAqparat - Aqtóbedegi avtobýs órtine qatysty sot otyrysy kezinde «Azııa Tranzıt Servıs» JShS-niń dırektory Jora Úmbetov óziniń kásipker ekenin bilmeıtini belgili boldy. Bul týraly sotqa deıingi jaýap alý kezinde aıtyldy, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda avtobýs órtine qatysty sot otyrysy jalǵasty. Sot otyrysy kezinde qaǵaz júzinde ǵana «Azııa Tranzıt Servıs» JShS-niń dırektory bolǵan Jora Úmbetovtiń jaýaby oqyldy.
«Tergeý kezinde mehanık Perdebaev, feldsher Hýsanbekovany jumysqa qabyldaý týraly buıryqtar, avtokólikti jalǵa alý, qyzmet kórsetý týraly kelisimsharttary usynyldy. Olarda «Azııa Tranzıt Servıs» JShS-niń dırektory J.Úmbetov degen tusqa qol qoıylǵan. Bul qujattarǵa men qol qoımadym. Ońtústik Qazaqstan oblysynda tirkelgen «Azııa Tranzıt Servıs» JShS-i týraly polıtsııa qyzmetkerlerinen ǵana estidim, ol fırma týraly múlde bilmeımin, dırektor emespin. Men týraly málimetterdi qalaı paıdalanǵanyn da bilmeımin», - dedi kýáger Jora Úmbetov.
Tergeý kezinde kýáger Jora Úmbetovtiń qujattaryn onyń týǵan jıeni Baýyrjan Kýlıshov alyp, paıdalanǵany belgili boldy. Qazirgi ýaqytta kýáger B.Kýlıshovtyń Almatyda turatyny anyqtaldy. Ol qylmystyq iske baılanysty jaýap berýi tıis bolǵanymen, sot otyrysyna kelmegen. Eger erteń odan habar bolmasa, kýágerdiń ótinishimen sot aldyndaǵy jaýaby oqylady.
«Men «Azııa Tranzıt Servıs» kompanııasynda ekonomıst-esepshi bolyp jumys istedim. Ózim kompanııa dırektory J.Úmbetovti múlde kórmedim, biraq kelisimshart qujattaryna qol qoıý quqyǵyn sot zalynda otyrǵan Nurlybek Tilepbaev berdi. Sol kúni de avtobýs ıesi Mehteevpen eki kelisimshart jasaldy. Alǵashqysy avtobýsty jalǵa alý boldy. Ol qujat jaramsyz bolyp, qyzmet kórsetý kelisimsharty jasaldy», - dedi kýáger Jarqynbek Qalyqulov.
Eske salsaq, búgin sot otyrysynda avtobýs órti kezinde kómektesken ózge jolaýshylar kóliginiń júrgizýshileri bergen jaýap oqyldy. Sonymen qatar, aldaǵy sot otyrysy kezinde jábirlenýshilerdiń ókilderinen habar alynady. Eger olar Ózbekstannan Qazaqstanǵa kelip, ózderiniń talap-tilekterin aıta almasa, jazbasha hat jiberedi.
