Aqtóbedegi avtobýs órti: Depýtattar kinálilerdiń barlyǵyn tabýdy talap etti
ASTANA. QazAqparat QR Parlamenti Májilisiniń depýtattary QR Bas prokýrory Qaırat Qojamjarov pen Іshki ister mınıstri Qalmuhanbet Qasymovqa Aqtóbe oblysynda avtobýstyń órtenýinen 52 adamnyń ajal qushýyna kinálilerdiń barlyǵyn tabýdy surady, dep habarlaıdy QazAqparat.
«Respýblıkalyq komıssııanyń oqıǵany jazataıym oqıǵa dep baǵalaýy senimsizdeý bolyp otyr. Avtobýstardyń baǵdaryn ózgertip, polıtsııa beketterin aınalyp ótýi, avtobýstyń birinshi qabatyn zattarymen toltyryp, ózderiniń ekinshi qabatta sapar sheshýge tosynnan ba? Jylynbaıtyn salonda dánekerlegish sham men benzınniń bolýyn, uzaq saparǵa shyǵar aldynda tyńǵylyqty tekserýden ótýi tıis avtobýs qozǵaltqyshynyń isten shyǵýyn tossynnan bolǵan dep oılaýdyń ózi qıyn», - dedi depýtattyq saýaldy oqyǵan Tursyn Syzdyqov.
Onyń atap ótýinshe, tıisti mınıstrlikter adamdardy tasymaldaýǵa arnalǵan kólik quraldaryn birshama keshigip bastasa da tekserý júrgizýdi qolǵa alýy «seńniń qozǵalǵanyn» bildiredi.
Halyq qalaýlysynyń paıymynsha, keıbir kóleńkeli qurylymdar Qazaqstandy ózge elderge adamdardy jetkizýde «tranzıttik dálizge» aınaldyrýǵa tyrysýda. Munan bólek, zańnamany aınalyp ótip, halyqaralyq tasymalmen aınalysatyn júrgizýshilerdi, ásirese kólik quraldarynyń tehnıkalyq jaı-kúıin teksermesten ruqsat qujattaryn berý áreketteriniń de bolýy múmkin.
«Problemalardyń basym bóligi polıtsııa shendileriniń, kólik ınspektsııasynyń qyzmetimen baılanysty sııaqty. «Jalǵan» qujattar olardyń qatysýynsyz nemese qamqorlyǵynsyz jasalmaıtyndyǵy belgili. Bul tizbe shekara jáne keden qyzmetteriniń jumysyn tyńǵylyqty zerdeleý qajettigin kórsetip otyr», - dedi ol.
Onyń aıtýynsha, joldardaǵy osyndaı qaıǵyly jaıttyń basty sebebi retinde «adamı faktor» qarastyrylýda jáne ol jedel sharalar qabyldaýdy talap etedi.
«Sondyqtan da júrgizýshilerdi ǵana jazalap qoımaı, kinálilerdiń barlyq tizbesin anyqtaý, zańnamamyzǵa sáıkes olardyń jaýapkershilik deńgeıin aıqyndaý qajet», - dedi Tursyn Syzdyqov.
Aıta keteıik, 18 qańtar kúni Samara-Shymkent tasjolynda avtobýs órtenip, 52 adam qaza boldy.
Keıinnen órtengen avtobýs ıesiniń lıtsenzııasy bolmaǵany anyqtaldy.
