Aqtóbedegi avtobýs apaty: Oblys ákimi zardap shekken oqýshylardyń jaǵdaıyn bildi
AQTÓBE. QazAqparat - Aqtóbede avtobýs aýdarylyp, oqýshylar aýrýhanada em alyp jatyr. Oblys ákimi Ońdasyn Orazalın zardap shekkenderdiń jaǵdaıyn bildi, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbe qalasyndaǵy №9 mektep-gımnazııasynyń 5 synyp oqýshylary men ata-analary mingen avtobýs aýdarylyp qaldy. Balalardyń bári din aman, aýrýhanada em qabyldap jatyr.
«Aqtóbe oblysynyń ákimi Ońdasyn Orazalın tótenshe oqıǵa boıynsha jaýapty sala basshylarymen shuǵyl keńes ótkizip, oblystyq balalar aýrýhanasyna bardy. Sol jerde apatqa ushyraǵan barlyq oqýshylardyń jáne ata-analardyń hal-jaǵdaıymen tanysty.
Aıta keteıik, bul tótenshe oqıǵa Memleket basshysy Qasym-Jomart Toqaevtyń tikeleı tapsyrmasymen baqylaýǵa alyndy. Aımaq basshysy oblystyq balalar aýrýhanasynyń bas dárigerine barlyq oqýshylardyń densaýlyqtaryn tolyqtaı tekserip, qadaǵalaýy qajet dep tapsyrma berdi», - dep habarlady oblys ákiminiń baspasóz qyzmeti.
Eske salsaq, Aqtóbe qalasynan 13 km jerde ornalasqan Soltústik aınalma jolynda jol-kólik oqıǵasy tirkeldi. Avtobýs júrgizýshisi jol erejesin buzyp, apatqa ushyraǵan.
Óńir basshysy oblystyq bilim basqarmasy men qalalyq bilim bólimine oblystyq polıtsııa departamentimen birlesip, demalys kúnderi tabıǵat aıasyna saparǵa shyǵatyn ata-analarǵa túsindirý jumystaryn júrgizýdi tapsyrdy.
