Aqtóbedegi aýyldarda ınternet joqtyń qasy - Prezıdent
Buǵan deıin habarlaǵanymyzdaı, Memleket basshysy Qasym - Jomart Toqaev oblys ákimi Ońdasyn Orazalınge 8 tapsyrma berdi.
«Memleket bıznesti, shaǵyn jáne orta kásipti qoldaıdy. Qazir memleket eń iri tapsyrys berýshi qyzmetin atqaryp otyr. Biz otandyq kásipkerlerdiń básekege qabiletti bolýy, memlekettik satyp alýǵa qatysýy úshin bar jaǵdaıdy jasaımyz. Elbasy 2050 jylǵa qaraı shaǵyn jáne orta bıznestiń ekonomıkadaǵy úlesin 50 paıyzǵa jetkizýdi tapsyrdy. Aldaǵy 5 jylda 30 paıyzǵa jetýdi kózdep otyrmyz. Tapsyrma qıyn, biraq oryndaýǵa bolady. Degenmen qazir oblystaǵy shaǵyn jáne orta bıznestiń ekonomıkaǵa úlesi 20 paıyzdan aspaıdy», - dedi Prezıdent Qasym-Jomart Toqaev.
Memleket basshysy óz sózinde aýyl men qala mektepterindegi bilim sapasyna basa mán berip, alshaqtyqty túbegeıli joıý úshin qajetti sharalar qabyldanatynyn jetkizdi. 2022 jylǵa deıin elimizde apatty jaǵdaıdaǵy jáne úshaýysymdy mektepter máselesi tolyq sheshiledi. Aqtóbe oblysynda qazir 13 úshaýysymda jáne 3 apatty jaǵdaıdaǵy mektep bar. Aqtóbe qalasynyń ózinde 26 myń bala kezekte tur.
«Oblys ákimine osy máseleler boıynsha naqty usynystar daıyndaýdy tapsyramyn. Ári jastardyń kásiptik, tehnıkalyq jáne joǵary bilim alýyna jaǵdaı jasaýymyz kerek. Adam kapıtalyn damytý - búgingi zaman talaby. Sol sebepti jastardyń bilim alýyna, kásibı biliktiligin arttyrýǵa basa nazar aýdaramyz. Aldaǵy 5 jylda bilim jáne ǵylym salasyna jumsalatyn qarjy ІJÓ-niń 5 paıyzyna deıin ósedi», - dedi Prezıdent.
Sonymen qatar, óńir jurtshylyǵymen kezdesý kezinde Aqtóbe oblysy elimizdiń azyq-túlik qaýipsizdigin qamtamasyz etýge zor úles qosatyn ortalyqqa aınalýy tıis dep tapsyrma berdi.
«Aımaqta agrosektordyń áleýeti tolyǵymen ıgerilmeı jatyr. Aqtóbe oblysy - jerdiń kólemi jaǵynan elimizdegi iri óńirlerdiń biri. ıAǵnı, aýyl sharýashylyǵyn damytý úshin qajetti resýrs jetkilikti. Ony tıimdi paıdalaný qajet. Oblys ákimdigi aýyl sharýashylyǵyn damytý boıynsha naqty jumys josparyn daıyndaýy tıis. Úzdik basqarý tájirıbesin, ozyq tehnologııany paıdalaný qajet. Agrosektordy damytsaq aýyl turǵyndaryna jańa jumys oryndary ashylady, ekonomıkanyń qarqyny artady. Sapaly jol, taza aýyz sý, jaryq bolmaı, aýyldyń damýy jaıly sóz qozǵaý múmkin emes», - dedi Prezıdent.
Kezdesý kezinde tsıfrlandyrýdyń kórsetkishi tómen ekeni aıtyldy. ıAǵnı, volokondy-optıkalyq jeli áli durys tartylmaǵan.
«Óńirde tsıfrlandyrý kórsetkishi tómen. Oblystaǵy aýyldardyń 11,5 paıyzyna ǵana talshyqty-optıkalyq jeli tartylǵan. Aýylda ınternet joqtyń qasy. Úkimet osy máseleni sheshýi tıis. Tsıfrlandyrý bolmaǵan soń ataýly áleýmettik kómek berý kezinde alaıaqtyq jasaǵandar da boldy. Mindetti medıtsınalyq saqtandyrý, bilim salasynda da tsıfrlandyrý mańyzdy», - dedi Prezıdent.