Aqtóbedegi aýylda er adam, kelinshek jáne jasóspirim úsheýi 13 úıdiń shóbin órtegen
AQTÓBE. QazAqparat - Aqtóbede aýyldy úreıde ustaǵan kúdiktiler qolǵa tústi. Aýyldaǵy mal azyǵyn órtegender arasynda kámeletke tolmaǵan aýyl turǵyny da bar, dep habarlaıdy QazAqparat tilshisi.
Aqtóbe oblysy Qarǵaly aýdany Qosestek aýylynda belgisiz bireýler shópti kezekpen órtep, keıbirine «kezek sende» dep úshbý hat tastap ketken bolatyn. Keıin jergilikti ákimdik arnaıy tergeý toby qurylǵanyn málimdep, zardap shekken adamdarǵa kómek kórsetilip jatqanyn habarlady. Al búgin polıtsııa úsh kúdiktiniń ustalǵanyn, onyń bireýi kámelet jasqa tolmaǵanyn málimdep otyr.
«Qazan-qarasha aılarynda Qosestek aýylynda 13 úıdiń aýlasyndaǵy mal azyǵy órtendi. Jalpy shyǵyn - 5,7 mıllıon teńge. Órt kezinde turǵyndardyń qorasy da kúlge aınaldy. Tergeý jumystary kezinde arnaıy top qurylyp, aýyldaǵy 1500-den astam turǵynmen jumys júrgizildi. Tergeý nátıjesinde úsh adam ustaldy», - dep habarlady oblystyq polıtsııa departamentiniń baspasóz qyzmeti.
Málimetke saı, órt oqıǵalarynyń bir-birine qatysy joq ekeni de anyqtaldy. Máselen, órt qoıǵandardyń biri kámelet jasqa tolmaǵan. Ol tanystary men týystary arasyndaǵy alaýyzdyqtan shópke ot qoıǵan.
Al 35 jastaǵy áıel kek alý úshin shóp órtegen.
25 jastaǵy er adam aýyldy úreıde ustap, materıaldyq kómek alýdy kózdegen eken.
Aıǵaq zattar jınaqtalyp, Aqtóbe oblystyq polıtsııa departamentiniń tergeý basqarmasy men protsessýaldy prokýrorlar tergeýdi jalǵastyryp jatyr.
