Aqtóbedegi aýyl turǵyndary kólik dońǵalaǵyn qaıyqqa aınaldyrdy
AQTÓBE. QazAqparat - Aqtóbedegi Baıǵanın aýdanynyń Kókbulaq aýyly kóktem saıyn qatynassyz qalady. Saǵyz ózenindegi qar sýy tasyǵan kezde ótkeldi sý shaıyp ketedi, dep habarlaıdy QazAqparat tilshisi.
Kókbulaq aýyly Qaraýylkeldi aýyldyq okrýgine qaraıdy. Mundaǵy halyq jyl saıyn kóktemde aýdan ortalyǵyna bara almaıdy. Sebebi, Saǵyz ózeniniń bastaýy qar sýyna tolyp, seń júrgen kezde turǵyndar óz qolymen qurastyrǵan kópir jaramsyz kúıge túsedi. Al jergilikti ákimdik bul aýylǵa múldem kópir qajet emes degen sheshimge kelgen.
«Kókbulaq aýylynda kópir bolǵan emes. Halyq óz qolymen qubyr qoıyp, ótkel jasap alǵan. Qar sýy erip, seń júrgen ýaqytta Saǵyz ózeniniń arnasy tolyp, qatynas bolmaı qalady. Bir apta baılanys úziledi. Bul jer Saǵyz ózeniniń bastaýy. Jazda múldem sý bolmaıdy. Az ýaqyttan keıin qurǵap ketedi», - dedi Baıǵanın aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Joldybek Aısultan. Jaýapty maman kópirge mol qarjy qajet degenimen jobalyq-smetalyq qujat týraly esh aqparat aıta almady.
Al Kókbulaq aýylynyń turǵyndary kóktemgi sý tasqyny kezinde ózderi qoldan jasap alǵan qatynasty jandandyrady. Bul aýyldyń halqy kólik dońǵalaǵynan jasalǵan qaıyqty arqanǵa baılap, ózenniń arǵy beti men bergi betinde turǵan er adamdardyń kúshimen aýdan ortalyǵyna baryp júr.
