Aqtóbedegi áýe qorǵanysy kúshteri áskerı ınstıtýtynyń jańa jataqhanasy ashyldy

Aqtóbe qalasyndaǵy T. Bıgeldınov atyndaǵy Áýe qorǵanysy kúshteri áskerı ınstıtýtynyń kýrsanttary úshin zamanaýı talaptarǵa saı jańa jataqhana ashyldy, dep habarlaıdy QazAqparat oblys ákimdigi saıtyna silteme jasap.

Jataqhanada áýe jáne ınjenerlik batalondardyń kýrsanttary, sondaı-aq áskerı medıtsına mamandyǵy boıynsha oqýǵa alǵash qabyldanǵan kýrsant qyzdar turady.

Kúrdeli jóndeýden ótken 280 oryndyq jataqhanada bolashaq ofıtserlerdiń demalýy, bos ýaqytyn tıimdi ótkizýi úshin barlyq qajetti jaǵdaı jasalǵan. Jatyn bólme, aqparattyq-tárbıe jumysy bólmesi, psıhologııalyq, rota komandırleri men olardyń orynbasarlary, vzvod serjanttarynyń komandırlerine arnalǵan kabınetter, qarýdy saqtaý jáne tazalaýǵa arnalǵan bólmeler bar. Ǵımarattyń birinshi qabatynda naýqastardy emdeıtin oryndar qarastyrylǵan, sondaı-aq áskerı qyzmetshilerdiń dárigerlik komıssııadan ótetin bólmeleri ornalasqan.

Ǵımarattyń ashylý saltanatyna Aqtóbe oblysynyń ákimi Ashat Shaharov pen Áýe qorǵanysy kúshteriniń Bas qolbasshysy avıatsııa general-maıory Dáýren Qosanov qatysty.

«Bıyl Talǵat Bıgeldınov atyndaǵy Áýe qorǵanysy kúshteriniń áskerı ınstıtýtyna 200-den astam kýrsant tússe, onyń 18-i - qyz. Oqý ornyna alǵash ret qabyldanǵan kýrsant qyzdar elimiz úshin mańyzdy salaǵa úles qosýǵa daıyn ekenderin kórsetip keledi. Avıatsııa salasyna mamandar daıarlaýda Aqtóbedegi ınstıtýt mańyzdy orynǵa ıe. Munda oblys, respýblıkanyń túkpir-túkpirinen ǵana emes, shet elderden de kelip oqýǵa túsedi. Demek, oqý ornyn básekege qabiletti dep aıtýǵa tolyqtaı negiz bar», - dedi oblys ákimi.

Áýe qorǵanysy kúshteriniń Bas qolbasshysy, avıatsııa general-maıory Dáýren Qosanov ta oqý ornynyń mańyzdylyǵy týraly tilge tıek etip, jańa jataqhananyń ashylýy áskerı bólimderde áskerı vedomstvo iske asyratyn úlgilik joba ekenin alǵa tartty.