Aqtóbedegi atyshýly sheneýnik memlekettik qyzmetke qaıta oralǵysy keledi

ASTANA. QazAqparat - Kúzde Aqtóbe oblysy densaýlyq saqtaý basqarmasy basshysynyń orynbasary qyzmetinen bosatylǵan Almat Ermaǵambetovten Aqtóbe qalalyq sotyna talap aryz kelip tústi, dep jazady diapazon.kz.

Qalalyq sot "Dıapazonǵa" habarlaǵandaı, oblystyq densaýlyq saqtaý basqarmasynyń burynǵy qyzmetkeri Almat Ermaǵambetov jumysyn qaıta qalpyna keltirý týraly talap aryz bergen. Sheneýnik byltyr kúzde bolǵan janjaldan keıin jumysynan bosatylǵan edi.

Eske sala ketsek, oblystyq densaýlyq saqtaý basqarmasy basshysynyń orynbasary bolǵan Almat Ermaǵambetov qyzdaryn bedeldi oqý ornyna túsirý úshin 20 000 dollar bergenin polıtsııaǵa habarlaǵan. Onyń aıtýynsha, tanys áıel úlken qyzyn Nazarbaev ýnıversıtetine, al ortanshy qyzyn Aqtóbedegi Nazarbaev mektebine túsirip beremin dep usynys bildirgen. Ol sheneýnikke NZM dırektoryn tanıtynyn, al JOO prorektory onyń aǵasy ekenin, al ózi emtıhan qabyldaıtyn komıssııanyń quramynda ekenin aıtqan kórinedi.

Sol sebepti sheneýnik áıelge senim artyp, óz áıeliniń kózinshe 20 myń dollar bergen jáne eshqandaı qolhat jazdyryp almaǵan.

Basy daýǵa qalǵan sheneýnik Aqtóbedegi memlekettik qyzmetine qaıta oralǵysy keledi.

Osydan keıin Ermaǵambetov iri kólemdegi alaıaqtyq týraly iste jábirlenýshi atandy. Bul bap boıynsha Botagóz Bıekenova sottalyp jatyr.