Aqtóbedegi atyshýly qylmys ashyldy
AQTÓBE. 28 aqpan. QazAqparat - Aqtóbeniń poltsııa qyzmetkerleri 2011 jyldyń qarasha aıynda qalanyń baq sharýashylyǵy birlestikteriniń birinde 5 adamnyń ólimine sebep bolǵan qylmysty ashty, dep habarlady búgin oblystyq ІІD-de ótken brıfıngte.
Sol kezde 34 jáne 54 jas aralyǵyndaǵy tórt er adam men bir áıeldiń múrdeleri tabylǵan bolatyn. Olardyń barlyǵy da Aqtóbeniń turǵyndary bolyp shyqty. QR QK-niń 96 baby («Adam óltirý») boıynsha qylmystyq is qozǵaldy.
Osy istiń aınalasynda kóptegen ósek-aıańdar júrgen bolatyn, qala turǵyndary ony dinı ekstermıstermen baılanystyryp ta jatty. Qylmystyq is oblystyq ІІD men QR ІІM-niń únemi baqylaýynda bolyp, aqyr aıaǵynda aq-qarasy anyqtaldy.
Ótkizilgen jedel-izdestirý sharalarynyń nátıjesinde kúdiktilerdiń esimderi anyqtalyp, olardyń biri - Atyraý oblysyndaǵy Maqat aýdanynyń 26 jasar turǵyny qolǵa tústi.
Anyqtalǵanyndaı, 2011 jyldyń 21 qarashasynda kúdikti azamat, onyń dosy jáne jábirlenýshiler saıajaıda spırttik ishimdikter iship otyrǵan.
Aralarynda týyndaǵan urys kezinde er adamdardyń bireýi ólgen. Sodan keıin bolǵan oqıǵany jasyryp, kýágerlerdiń kózin qurtý úshin kúdikti men onyń sybaılasy uıyqtap qalǵan basqa bótelkelesterin tunshyqtyryp óltirgen.
Qazirgi kezde kúdikti qamaýǵa alyndy, basqa tulǵalardyń qatystylyǵyn anyqtaý boıynsha sharalar qoldanylyp jatyr.
