Aqtóbedegi atys: Polıtsııaǵa pyshaq ala júgirgen aqtóbeliktiń kim ekeni anyqtaldy
AQTÓBE. QazAqparat - Aqtóbede polıtsııaǵa baǵynbaı, pyshaq ala júgirgen A.Sanatqa qatysty qylmystyq is qozǵaldy. Ol buryn da bılik ókiline baǵynbaǵany úshin isti bolǵan, dep habarlaıdy QazAqparat tilshisi.
Aqtóbe qalasyndaǵy Ǵazıza Jubanova kóshesinde qarýdan oq atylyp, turǵyndar polıtsııanyń is-áreketin uıaly telefondaryna túsirip aldy. Áleýmettik jeli arqyly tarap ketken vıdeoǵa qatysty oblystyq ІІD baspasóz qyzmeti aqparat taratty. Keshe keshkilik «Land Krýzer-200» kóliginiń ıesi jol-kólik oqıǵasyn jasap, eki kólikti zaqymdady. Biraq ol oqıǵa ornynan qashyp ketip, polıtsııanyń nazaryna ilikken bolatyn.
«Polıtsııany kórgen kezde qolyna pyshaq alyp, qarsy kezendi. Sol jerdegi adamdarǵa qaýip tóndirip, qorqytty. Kúdiktini ustaý kezinde polıtsııa qyzmetkerleri joǵaryǵa eskertý oǵyn atty. Buryn sottalǵan 44 jastaǵy Aqtóbe qalasynyń turǵyny ustaldy. Ol esirtki tutynǵan. Oqıǵa ornynan jınalmaly pyshaq tárkilendi. Sonymen qatar, Qylmystyq kodekstiń «Bılik ókiline qatysty kúsh qoldaný» baby boıynsha qylmystyq is qozǵaldy. Kúdikti ýaqytsha tergeý ızolıatorynda qamaldy»,- dep habarlady oblystyq ІІD baspasóz qyzmeti.
Aıta keteıik, kúdikti A.Sanat 2016 jyly Qylmystyq kodekstiń «Bılik ókiline baǵynbaý» baby boıynsha jaýapkershilikke tartylǵan. Ol kezde de kúdikti esirtki tutynyp, polıtsııaǵa baǵynbaǵan. Tipti, tergeý kezinde kólikten marıhýana tabyldy. Eki jyl buryn sot 120 saǵat qoǵamdyq jumysqa tartý jazasyn taǵaıyndaǵan bolatyn. Sot materıalyna súıensek, ol jaýapkershiligi shekteýli seriktestiktiń basshysy bolyp jumys isteıdi.
