Aqtóbedegi áskerı ınstıtýtta Talǵat Bıgeldınovtiń murajaıy ashyldy
Mádenı-aǵartý is-sharasy Talǵat Bıgeldınovtiń bıýstine gúl qoıýdan bastaldy. Oǵan áskerı oqý ornynyń qolbasshylyǵy, kýrsanttar, qarýly kúshterdiń ardagerleri men qala ákimshiliginiń ókilderi qatysty.
«Talǵat Bıgeldınovtiń taǵdyry – qaıtpas qaısarlyqtyń, bytyldyqtyń, kásibılik pen Otanǵa degen mahabbattyń úlgisi. Surapyl soǵys jyldarynda ol Il-2 ushaǵynda 305 jaýyngerlik ushýdy júzege asyrǵan. Bul degenimiz – áýede ótken 500 saǵat. Erligi úshin Lenın, Qyzyl Tý, Aleksandr Nevskıı, Qyzyl juldyz, ІІІ dárejeli Dańq, І jáne ІІ dárejeli Uly Otan soǵysy ordenderimen nagradtalyp, eki márte Keńes Odaǵynyń batyry ataǵyn aldy», - dedi óz sózinde ınstıtýt basshysy Dáýren Qosanov.
Áýe qorǵanysy kúshteri áskerı ınstıtýty aýmaǵynda murajaı ashyldy. Ol jerde Bıgeldınovter otbasynyń jeke muraǵatynan alynǵan sırek kezdesetin fotosýretter jáne Talǵat Bıgeldınovtiń ómiri men qyzmeti týraly baıandaıtyn basqa da eksponattar usynylǵan. Instıtýt basshylyǵynyń pikirinshe, murajaı aqtóbelikter men Ortalyq Azııadaǵy jalǵyz áskerı ushý ınstıtýtynyń kýrsanttaryn tárbıeleýde yqpal etedi.
Sondaı-aq, Aqtóbe oblysy ákimi apparatynyń qoldaýymen Ǵazıza Jubanova atyndaǵy oblystyq fılarmonııada qala turǵyndary men qonaqtary úshin áskerı ınstıtýt pen Aqtóbe garnızony kórkemónerpazdar ujymdarynyń qatysýymen kontsert uıymdastyryldy.
Aıta ketsek, búgin elordada da Talǵat Bıgeldınovtiń týǵanyna 100 jyl tolýyna oraı, batyrdy eske alý sharasy ótti.
