Aqtóbedegi Analar sletyna 1200-den asa delegat qatysady
ASTANA. QazAqparat - 20-21 qyrkúıek kúnderi Aqtóbe oblysynda Analar sleti ótedi, dep habarlaıdy óńirlik ákimdiktiń baspasóz qyzmeti.
Aýqymdy is-sharaǵa Qazaqstannyń barlyq óńirinen 1200-den astam delegat qatysady. Olar - elimizdiń damýyna óz úlesterin qosqan memlekettik organdardyń, bıznes, mádenıet, bilim, densaýlyq saqtaý jáne sport salalarynyń ókilderi.
Slet qatysýshylary úshin Aqtóbe qalasynyń mádenı jáne áleýmettik nysandaryna barý, dóńgelek ústelderge, sheberlik sabaqtary men jattyǵýlarǵa qatysý sııaqty taǵy da basqa is-sharalar qarastyrylǵan eki kúndik aýqymdy baǵdarlama daıyndalǵan.
Dóńgelek ústel barysynda delegattar áıelderdiń qoǵamdaǵy áleýmettik róli men mártebesin arttyrýdyń, demografııalyq saıasattyń damýyn, sondaı-aq, qazirgi zamanǵy otbasy, ana men bala máselelerin talqylap, olardy sheshýdiń naqty joldaryn jasaı alady.
Analar sletinde "Týǵan jerge taǵzym" aktsııasy aıasynda metsenattar qarajatyna salynǵan Qazaqstandaǵy tuńǵysh "Anaǵa taǵzym" rýhanı-tanymdyq tárbıe ortalyǵynyń ashylýy josparlanǵan. Atalmysh joba árqaısymyz úshin esimderi qasıetti barlyq analarǵa qurmet kórsetýge arnalǵan. Qonaqtar ortalyqtyń ekspozıtsııalyq zalynda Qazaqstan tarıhynda mańyzdy ról atqarǵan qazaq halqy áıelderiniń ómiri men erlik isteri týraly jan jaqty tanysa alady.
«Anaǵa taǵzym» ortalyǵynda óskeleń urpaqqa bilim berý jáne tárbıe jumystary júrgizilip, jastarǵa zamanaýı qoǵamda qajet qundy baǵdarlardy damytýǵa múmkindik beretin psıhologııalyq jeńildeý jáne keńes berý, qoldanbaly óner, jalpy damý, mýzykalyq tárbıe berý, stılıstıka men dızaın, otbasylyq trenıng júrgizý kabınetteri men basqa da qyzmet túrleri jumys jasaıtyn bolady.
