Aqtóbedegi alyp zaýytta jumys isteıtin kranshylardyń teń jartysy - áıel
AQTÓBE. QazAqparat -Aqtóbe ferroqorytpa zaýytynda jumys isteıtin kran mashınısiniń teń jartysy - áıel. Er azamattarmen teń jumys isteıtin názik jandylar qıyndyqty tabandylyqpen jeńip keledi, dep habarlaıdy QazAqparat tilshisi.
Aqtóbe ferroqorytpa zaýytynda er adamdarmen birge áıelder de jumys isteıdi. Olardyń kóbi kranshy mamandyǵyn ıgergen. Gúldana Dúısenǵalıeva salmaǵy 20 tonnalyq, bıiktigi 12 metr bolatyn kranǵa kún saıyn kóterilip, júkti vagondarǵa tıep, túsirip beredi.
«Bala kezimde dáriger bolýdy armandadym. Balalyq armanym júzege aspaǵandyqtan ártúrli salalarda qyzmet jasadym. 2012 jyly jumyspen qamtý ortalyǵynyń kómegimen kranshylar daıyndaıtyn kýrsty bitirip shyqtym. Sodan Aqtóbe ferroqorytpa zaýytynyń daıyn ónim tsehyna jumysqa keldim. Tájirıbem az bolǵandyqtan jumysqa kelgende óz isiniń sheberi atanǵan tálimger Sánimgúl Jumaǵalıevanyń qaraýynda boldym. Alǵashqy kúni krandy basqarýǵa qoryqtym. Sebebi, tómende turatyn adamdardyń ómiri bizge baılanysty, júkti de óz retimen tıeý kerek. Bala kezimnen bıiktikten qorqatyn edim. Bul da qorqynyshymdy údetti. Biraq birneshe kún tálim alyp, bárin úırendim. Qolym da, kózim de úırendi. Qazirgi kezde kransyz ómirimdi elestete almaımyn. Osy jerden zeınetke shyqqym keledi», - dedi Gúldana Dúısenǵalıeva.
Kran ishi qysta sýyq, jazda ystyq bolady. Biraq kran basqaratyn názik jandylar jumystyń bul qıyndyǵynan qashqan emes.
«Bizdiń tsehtyń ózinde 31 kran mashınısi aýysymmen jumys isteıdi. Onyń teń jartysy - áıelder. Óndiristegi jumystyń 90 paıyzy krannyń kómegimen atqarylady. Kran mashınısi kúndelikti tapsyrmany tómendegi ilýshi mamanmen birge atqarady. Eki maman birlese negizgi jumysty atqarady», - dedi daıyn ónim tsehynyń aǵa óndiris sheberi Aleksandra Ýrbısenova.
