Aqtóbedegi aqyly jerleý rásimi zańsyz bolyp shyqty

Oblystaǵy beıitter Jerleý rásimin uıymdastyrýdyń biryńǵaı ortalyǵyna 2017 jyly berilgen bolatyn. Sol kezde halyq qarsy bolǵanymen arnaıy ortalyq baǵany bekitip, jumysyn bastady. Hrıstıan rásimimen jerleý 80 myń teńge bolsa, musylmansha jerleý 120-450 teńge aralyǵynda. Qarapaıym halyq ózi kirip, jer qazyp jerleı almaıdy. Eń quryǵanda qyzmeti úshin ortalyq 20 myń teńge alyp otyrǵan. Qazir bul istiń zańsyz ekeni anyqtaldy.
«Jerleý rásimi bir ǵana ortalyqqa berilgen. Bul básekelestik zańdylyǵyna qarsy. Sondyqtan ákimshilik jaýapkershilikke tartý úshin is sotqa jiberildi. Ortalyqqa 200-1500 AKE kóleminde aıyppul salynýy múmkin. Bizge ózge jerleý rásimin uıymdastyratyn ortalyq aryz jazǵan bolatyn. Sol aryz boıynsha tekserý júrgizildi. 2018 jyly sotqa jiberilip, departament jeńilip qaldy. Al Joǵary sot sheshimdi buzyp, básekelestik zańnamasynyń saqtalmaǵanyn rastady», - dedi oblystyq tabıǵı monopolııalardy retteý jáne básekelestikti qorǵaý departamenti basshysynyń orynbasary Saǵyndyq Erǵalıev.
Aıta keteıik, 2017 jyly 50 beıit Jerleý rásimin uıymdastyrýdyń biryńǵaı ortalyǵyna senimgerlik basqarýǵa berildi. Sol kezde departament basqa ortalyqtardyń da erkin jumys isteýine jol ashýǵa uıǵarym bergen. Tipti Jer týraly kodeks boıynsha qaıtys bolǵan ár adamǵa 6 sharshy metrlik jer tegin berilýi tıis. Ár adamnyń artynda qalǵan týǵan-týystary kedergisiz jerleýdi júrgize alady. Biraq Aqtóbede bul zańdylyq saqtalmady.
«Tutynýshylardyń quqyqtaryn qorǵaý departamenti men oblystyq tabıǵı monopolııalardy retteý jáne básekelestikti qorǵaý departamentine shaǵym túsirdik. Sebebi beıitterdi senimgerlik basqarýǵa alǵan kompanııa ózge ortalyqtardy terrıtorııaǵa múlde kirgizbedi. Máselen, jerleýge kelgen ár adamnan 20 myń teńge aldy. Bul kezde jerdi qazbaıdy, daıyndamaıdy. Bul tek beıitten oryn alýǵa tólenetin aqsha. Al ortalyq tek osy qyzmeti úshin dep kelisimshartqa qol qoıýǵa májbúrleıdi», - dedi jerleý qyzmetterin kórsetýshiler qaýymdastyǵynyń zańgeri Rasıma Latypova.