Aqtóbedegi jol apaty: Zardap shekkenderdiń bári oblys ortalyǵyna jetkizildi

AQTÓBE. KAZINFORM – Tórt naýqas №1 Aqtóbe qalalyq aýrýhanasynda, bireýi Aqtóbe kópsalaly aýrýhanasynda, bireýi balalar aýrýhanasynda jatyr.

Samara-Shymkent tasjolyndaǵy jol-kólik apatynda zardap shekken jolaýshylardyń altaýy da Aqtóbe qalasyndaǵy emdeý oryndaryna jetkizildi. Qazirgi kezde tórt naýqas №1 Aqtóbe qalalyq aýrýhanasynda, bireýi Aqtóbe kópsalaly aýrýhanasynda, bireýi balalar aýrýhanasynda jatyr. 

- №1 Aqtóbe qalalyq aýrýhanasynda jatqan tórt naýqastyń úsheýi esin biledi, jaǵdaıy jaqsaryp keledi. Al bir naýqas – es-túzsiz kúıde. Aqtóbe oblystyq balalar aýrýhanasynda jatqan jasóspirimniń birneshe jaraqaty bar. Ol esin jımady. Dárigerler QR bas balalar neırohırýrginiń mindetin atqarýshynyń nusqaýyn oryndap jatyr,- dep habarlady Aqtóbe oblystyq densaýlyq saqtaý basqarmasynyń baspasóz qyzmeti. 

Taǵy bir naýqas qazir Aqtóbe kópsalaly aýrýhanasynda jatyr. Ol ýrologııa bóliminiń jansaqtaý bóliminde bolǵanymen, esin biledi. 

Eske salsaq, Aqtóbede eki kólik soqtyǵysyp, 12 adam qaza tapty. Oqıǵa Áıteke bı aýdany Belqopa aýyly mańynda boldy. Júk kóligi men jolaýshylar tasymaldaıtyn GAZel soqtyǵysty. Aman qalǵan jolaýshylardyń úsheýi aýyr jaǵdaıda ekeni aıtyldy.

Jol-kólik oqıǵasynan soń Samara-Shymkent tasjolynyń bir bóligi jabyldy. 

ІІM Aqtóbe oblysyndaǵy jol-kólik oqıǵasyn tergeý úshin arnaıy top jiberdi.

Aqtóbede jol-kólik apatyna kimniń kináli ekeni naqtylandy.

Premer-mınıstr Oljas Bektenovtiń tapsyrmasymen Aqtóbe oblysy Áıteke bı aýdany Belqopa aýylynyń shetinde bolǵan jol-kólik oqıǵasynyń sebepterin tergeý jóninde úkimettik komıssııa qurylǵany anyqtaldy.

Premer-mınıstrdiń orynbasary Qanat Bozymbaev zardap shekkenderdi sanavıatsııamen Astana qalasyna jetkizýdi tapsyrdy.

Úsheýi ótken jumada Aqtóbe qalasyna tasymaldandy. Onyń bireýi – jasóspirim.