Aqtóbedegi jol apaty: Zardap shekken úsh adam oblys ortalyǵyna jetkiziledi

AQTÓBE. KAZINFORM — Úsh adamnyń biri jasóspirim. Ony oblystyq balalar aýrýhanasyna ákeledi. 

Aqtóbedegi jol-kólik apaty kezinde zardap shekken adamdardyń jaǵdaıy áli de aýyr. Oblystyq densaýlyq saqtaý basqarmasynyń basshysy Erlan Sultangereevtiń aıtýynsha, olardyń jaǵdaıyn baqylyp, úsheýin oblys ortalyǵyna tasymaldaý sheshimi qabyldanǵan.

— Búgin úsh naýqasty sanavıatsııamen qalaǵa ákelemiz. Bireýi 16 jastaǵy bala. Onyń jaǵdaıy aýyr. Jasóspirimge qaladan balalar brıgadasyn arnaıy jiberdik. Tasymaldaý kezinde balalar dárigerler janynda bolady. Keshe zardap shekkenderdiń otbasymen kezdesip, qandaı em-shara júrgizilip jatqanyn túsindirip aıttym. Qazir Ulttyq shuǵyl medıtsına ortalyǵymen baılanysta otyrmyz. Eger qajet bolsa Astanaǵa sanavıatsııa arqyly jiberemiz. Ázirge ondaı qajettilik joq. Bári de tolyq tekserýden ótip jatyr, — dedi Erlan Sultangereev.

Eske salsaq, Aqtóbede eki kólik soqtyǵysyp, 12 adam qaza tapty. Oqıǵa Áıteke bı aýdany Belqopa aýyly mańynda boldy. Júk kóligi men jolaýshylar tasymaldaıtyn GAZel soqtyǵysty. Aman qalǵan jolaýshylardyń úsheýi aýyr jaǵdaıda ekeni aıtyldy. Jol-kólik oqıǵasynan soń Samara-Shymkent tasjolynyń bir bóligi jabyldy.  ІІM Aqtóbe oblysyndaǵy jol-kólik oqıǵasyn tergeý úshin arnaıy top jiberdi. Aqtóbede jol-kólik apatyna kimniń kináli ekeni naqtylandy. Premer-mınıstr Oljas Bektenovtiń tapsyrmasymen Aqtóbe oblysy Áıteke bı aýdany Belqopa aýylynyń shetinde bolǵan jol-kólik oqıǵasynyń sebepterin tergeý jóninde úkimettik komıssııa qurylǵany anyqtaldy.

Premer-mınıstrdiń orynbasary Qanat Bozymbaev zardap shekkenderdi sanavıatsııamen Astana qalasyna jetkizýdi tapsyrdy.