Aqtóbedegi jol apaty: Qaza tapqandardyń ekeýi bala

AQTÓBE. KAZINFORM — Jol-kólik apaty kezinde kóz jumǵandardyń arasynda 2016 jáne 2022 jylǵy eki bala bar. Ózgesi eresekter.

Samara — Shymkent tasjolynda bolǵan jol-kólik apaty kezinde eki bala kóz jumyp, bireýi aýrýhananyń jansaqtaý bólimine tústi. Al ózgeleriniń bári — eresekter. 

— Saǵat 15:30–daǵy aqparatqa súıensek, Hromtaý aýdandyq aýrýhanasynda 6 adam bar. Onyń bireýi 2009 jyly týǵan bala. Naýqastardyń tórteýi jansaqtaý bóliminde, al ekeýi palatada em qabyldap jatyr. Oblys ortalyǵynan eki brıgada jiberildi. Olardyń qatarynda reanımatolog, travmatolog, hırýrg, neırohırýrg bar. Em-dom kezinde ota da jasaldy. Qazirgi kezde barlyq medıtsınalyq kómek berilip jatyr. Dári-dármek, qan jetkilikti. Aýrýhanaǵa jetkizilip, keıin úıine ketken adam da qaıta emdeý ornyna jatqyzyldy. Ol dárigerlerdiń baqylaýynda bolady, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.

Oqıǵa ornyna barǵan Aqtóbe oblysynyń ákimi qajetti kómek kórsetiletinin aıtty. 

— Oqıǵa ornyna ózim kelip, qarap shyqtym. Janymyzǵa batatyn aýyr qaza. Týma-týys, jaqyndarǵa kóńil aıtamyz. Biz úshin óte aýyr qaza boldy. Tańǵy saǵat 08:00–den óte osyndaı oqıǵa bolǵannan keıin barlyq tıisti memlekettik organdar óz jumysyn atqaryp keledi. Bizdiń tarapymyzdan jan-jaqty kómek uıymdastyryldy. Barlyq jaǵdaı óz baqylaýymda bolady, — dedi Aqtóbe oblysynyń ákimi Ashat Shaharov.

Al Áıteke bı aýdanynyń ákimi Dáýletııar Toǵyzbaevtyń aıtýynsha, GAZel Aqtóbe qalasy men Áıteke bı aýdany arasynda adam tasymaldaǵan. Jumysyn maýsym aıynda bastapty.

— Tasymaldaýshy kompanııa — jeke kásipker. Maýsym aıynan bastap resmı, kelisimshartqa sáıkes tasymaldaýmen aınalysady. Tańǵy 7:00–de ádettegideı aýyldan shyqqan. Salonda qalaǵa jeke sharýalarmen bara jatqan azamattar boldy. GAZel 16 oryndyq ári jańa, — dedi Dáýletııar Toǵyzbaev.

Aıta ketek, oqıǵa búgin saǵat 08:40–ta boldy. Jolaýshylar kóliginiń ishinde ákesi men balasy, anasy men stýdent uly bolǵan. 

Jol-kólik apaty kezinde qaza bolǵan ár jolaýshynyń otbasyna (10 adamǵa — red.) 1 mln teńgeden bólinedi.

Eske salsaq, Aqtóbede eki kólik soqtyǵysyp, 12 adam qaza tapty. Oqıǵa Áıteke bı aýdany Belqopa aýyly mańynda boldy. Júk kóligi men jolaýshylar tasymaldaıtyn GAZel soqtyǵysty.

Aman qalǵan jolaýshylardyń úsheýi aýyr jaǵdaıda ekeni aıtyldy. 

Jol-kólik oqıǵasynan soń Samara-Shymkent tasjolynyń bir bóligi jabyldy.

ІІM Aqtóbe oblysyndaǵy jol-kólik oqıǵasyn tergeý úshin arnaıy top jiberdi. 

Aqtóbede jol-kólik apatyna kimniń kináli ekeni naqtylandy.

Premer-mınıstr Oljas Bektenovtiń tapsyrmasymen Aqtóbe oblysy Áıteke bı aýdany Bógetsaı aýylynyń shetinde bolǵan jol-kólik oqıǵasynyń sebepterin tergeý jóninde úkimettik komıssııa qurylǵany anyqtaldy.