Aqtóbedegi jol apaty: Qanat Bozymbaev Úkimettik komıssııaǵa tapsyrma berdi

ASTANA. KAZINFORM — Premer-mınıstrdiń orynbasary Qanat Bozymbaev Aqtóbe oblysynyń Áıteke bı aýdany mańynda bolǵan jol-kólik oqıǵasynyń sebepterin tergep-tekserý jónindegi Úkimettik komıssııa múshelerine tapsyrmalar bergeni málim boldy, dep habarlaıdy Úkimettiń baspasóz qyzmeti.

Qazirgi jaǵdaı týraly Aqtóbe oblysynyń ákimi Ashat Shaharov, ishki ister mınıstri Erjan Sádenov, densaýlyq saqtaý vıtse-mınıstri Erbol Ospanov, eńbek jáne halyqty áleýmettik qorǵaý vıtse-mınıstri Asqarbek Ertaev, kólik vıtse-mınıstri Jánibek Taıjanov baıandady.

— Alty adam Aqtóbe oblysy Hromtaý aýdandyq ortalyq aýrýhanasyna jetkizildi. Eki adamnyń jaǵdaıy aýyr, tórteýiniń jaǵdaıy ortasha. Qanat Bozymbaev Densaýlyq saqtaý mınıstrligine sanıtarlyq avıatsııa arqyly tasymaldaýǵa bolatyn barlyq zardap shekkenderdi Astanaǵa jetkizip, qajetti em uıymdastyrýdy tapsyrdy, — delingen habarlamada.

Eńbek jáne halyqty áleýmettik qorǵaý mınıstrligine jáne Aqtóbe oblysynyń ákimine qaza tapqandardyń otbasylaryna barlyq qajetti materıaldyq jáne psıhologııalyq kómek kórsetýdi tapsyrdy.

Jol-kólik oqıǵasynyń sebepterin jan-jaqty tergeýmen Іshki ister mınıstrliginiń arnaıy komıssııasy aınalysýda, qylmystyq is qozǵaldy. Іshki ister mınıstrligi men Kólik mınıstrligine vıtse-premer «Samara — Shymkent» trassasynyń qaýipsizdik deńgeıin arttyrý jóninde usynystar engizýdi tapsyrdy.

Aıta keteıik, 23 qazan kúni saǵat 08:40–ta respýblıkalyq mańyzy bar «Samara — Shymkent» avtojolynyń 927-shaqyrymynda Ózbekstan azamaty basqarǵan «DAF» júk kóligi Hromtaýdan Qarabutaq baǵytyna qaraı shyqqan kezde rólge ıe bola almaı, qarsy baǵytta kele jatqan «Gazel» jolaýshylar kóligimen soqtyǵysty. Jol apaty saldarynan eki avtokóliktiń júrgizýshileri men Aqtóbe oblysynyń on turǵyny (onyń ishinde eki kámeletke tolmaǵan) oqıǵa ornynda qaza tapty.

Aman qalǵan jolaýshylardyń úsheýi aýyr jaǵdaıda ekeni aıtyldy. 

Jol-kólik oqıǵasynan soń Samara-Shymkent tasjolynyń bir bóligi jabyldy. 

ІІM Aqtóbe oblysyndaǵy jol-kólik oqıǵasyn tergeý úshin arnaıy top jiberdi. 

Aqtóbede jol-kólik apatyna kimniń kináli ekeni naqtylandy. 

Premer-mınıstr Oljas Bektenovtiń tapsyrmasymen Aqtóbe oblysy Áıteke bı aýdany Bógetsaı aýylynyń shetinde bolǵan jol-kólik oqıǵasynyń sebepterin tergeý jóninde úkimettik komıssııa qurylǵany anyqtaldy.