Aqtóbedegi jol apaty: Aqtóbeden naýqasty Astanaǵa jetkizdi

AQTÓBE. KAZINFORM — Qazaqstan TJM ushaǵy Aqtóbeden naýqasty Astanaǵa jetkizdi. Bul týraly TJM baspasóz qyzmeti habarlady. 

Qazaqstan TJM «Qazavıaqutqarý» ushaǵy Aqtóbe-Astana baǵyty boıynsha sanıtarlyq reıs jasady. Samara-Shymkent jolynda bolǵan jol apatynda jaraqat alǵan 50 jastaǵy er adam elordaǵa jetkizildi.

Naýqastyń jaǵdaıy aýyr bolǵandyqtan, ony shuǵyl túrde Astanaǵa tasymaldaý qajet boldy.

Ushaq medıtsınalyq qural-jabdyqtarmen tolyq qamtamasyz etilip, bortta dárigerler úzdiksiz baqylaý júrgizdi.

TJM ekıpajy men medıtsınalyq brıgada naýqastyń qaýipsiz jáne jyldam jetkizilýin qamtamasyz etti. Er adam elordalyq mamandardyń baqylaýymen emin jalǵastyrady.

Eske salsaq, Aqtóbede eki kólik soqtyǵysyp, 12 adam qaza tapty. Oqıǵa Áıteke bı aýdany Belqopa aýyly mańynda boldy. Júk kóligi men jolaýshylar tasymaldaıtyn GAZel soqtyǵysty. Aman qalǵan jolaýshylardyń úsheýi aýyr jaǵdaıda ekeni aıtyldy. Jol-kólik oqıǵasynan soń Samara-Shymkent tasjolynyń bir bóligi jabyldy. ІІM Aqtóbe oblysyndaǵy jol-kólik oqıǵasyn tergeý úshin arnaıy top jiberdi. Aqtóbede jol-kólik apatyna kimniń kináli ekeni naqtylandy. Premer-mınıstr Oljas Bektenovtiń tapsyrmasymen Aqtóbe oblysy Áıteke bı aýdany Belqopa aýylynyń shetinde bolǵan jol-kólik oqıǵasynyń sebepterin tergeý jóninde úkimettik komıssııa qurylǵany anyqtaldy.

Premer-mınıstrdiń orynbasary Qanat Bozymbaev zardap shekkenderdi sanavıatsııamen Astana qalasyna jetkizýdi tapsyrdy.