Aqtóbedegi jer qoınaýyn paıdalanýshylar eń úzdik qoljetimdi tehnıkalardy engizýge qulyqsyz
AQTÓBE. KAZINFORM — Ekologııalyq ahýaldy jaqsartý úshin jer qoınaýyn paıdalanýshylar eń úzdik qoljetimdi tehnıkalardy paıdalaný kerek. Aqtóbedegi iri óndiris oryndary bul standartty qabyldaýǵa asyqpaıdy.
Aqtóbege QR Ekologııa jáne tabıǵı resýrstar vıtse-mınıstri Jomart Álıev keldi. Turǵyndarmen kezdesýde aýa raıynyń lastanýy, túrli qaldyqtardy joıý, káriz-sorǵy stansasynyń qurylysy jaıly sóz boldy. Turǵyndar men tabıǵat janashyrlary aldymen lastanǵan atmosfera týraly surady.
— Elimizde TOP-50 tizimi bar. Bul tizimge ekologııaǵa zalal keltirip turǵan eń iri óndiris oryndary engen. Qorshaǵan orta emıssııasynyń 80 paıyzdan astamy osy TOP-50 kompanııaǵa tıesili. Sonyń ishinde «SNPS-Aqtóbemunaıgaz» AQ, ERG kompanııalar tobyna kiretin zaýyttar men ózge munaı kompanııalary bar. Qazirgi kezde osynyń ishinen ERG kompanııalar tobyna kiretin Aqtóbe ferroqorytpa zaýyty eń úzdik qoljetimdi tehnıkalardy engizip jatyr. Aldaǵy 10 jyldyń ishinde kompanııa eýropalyq standartqa jetýi tıis. Mindet osy. Zaýyt ónerkásip emıssııalarǵa salyqtyq ekologııalyq tólemderdi tóleýden bosatylady. Eger talap oryndalmasa, bári keri qaıtarylady. Bul jaýapkershilikti arttyratyn baǵyt. Biraq Aqtóbedegi munaı-gaz salasyndaǵy iri óndiris oryndary eń úzdik qoljetimdi tehnıkalardy engizýge qulyqsyz. Bıyl da, keler jyly da olardyń josparynda joq, — dedi QR Ekologııa jáne tabıǵı resýrstar vıtse-mınıstri Jomart Álıev.
Onyń aıtýynsha, bul óndiristi jańǵyrtý ári ekologııalyq ahýaldy jaqsartý joly.
Aıta keteıik, Aqtóbede quny 53,5 mlrd teńge bolatyn Káriz-sorǵy stansasynyń qurylysy 2026-2027 jyldarǵa josparlanǵan. Qazirgi kezde qalany qamtyp otyrǵan jalǵyz stansanyń tozý kórsetkishi 70 paıyzǵa jetti. Bul qazir aýany lastaýshy kózdiń biri.
Sonymen birge Alǵa hımııa zaýytyndaǵy 730 myń tonna qaldyqtyń qashan joıylary belgisiz.