Aqtóbedegi «Jaısań» jáne «Álimbet» shekara beketterinde nelikten kezek túzildi
AQTÓBE. KAZINFORM - Qazir birinde jol jóndeý jumystary júrip jatyr, ekinshisinde jańǵyrtý jumysy qarqyndy. Aqtóbe oblysy boıynsha memlekettik kirister departamenti jaǵdaıdyń baqylaýda ekenin aıtty.
Ótken aptada «Jaısań» shekara beketine qarama-qarsy ornalasqan «Saǵarshyn» ótkizý beketinde jol jóndeý jumystary bastaldy. Endi Reseıden kirýge arnalǵan joldyń tek bir jolaǵymen kezek-kezek júrýge bolady. ıAǵnı bir ýaqytta bir baǵyttaǵy kólikter ótedi, keıin qozǵalys baǵyty aýystyrylady.
- Jol jóndeý jumystarynyń júrgizilýine baılanysty júk jáne jeńil avtokólikterdiń azdaǵan keptelisi baıqalady. Al «Álimbet» shekara beketinde rekonstrýktsııa jumystary júrip jatyr. Eki ótkizý beketindegi jaǵdaı Aqtóbe oblysy boıynsha memlekettik kirister departamenti basshylyǵynyń turaqty baqylaýynda. Qazirgi ýaqytta kólik qozǵalysy júzege asyrylyp jatyr, memlekettik shekaradan ótkizý kezinde aıtarlyqtaı qıyndyq baıqalmaıdy. Kezek edáýir azaıdy,- dep habarlady Aqtóbe oblysy boıynsha memlekettik kirister departamenti.
Eske salsaq, bıyl maýsymda «Jaısań» — «Saǵarshyn» shekara beketindegi kezekte 600-den astam júk kóligi turdy. Tasymaldaýshylardyń aıtýynsha, «Saǵarshyn» shekara beketiniń ótkizý qabileti tómen. Bir ǵana jolaqta qabyldaıdy. Onda da jeńil jáne jolaýshylar tasymaly kóligine basymdyq berip, keıin ǵana júk kóligin ótkizedi.
