Aqtóbedegi Jaısań shekara beketinde kezek kóbeıdi
AQTÓBE. KAZINFORM — Oblystyq kásipkerler palatasyna bir aptada 200-den astam shaǵym túsken. Shekaradan ótetin júrgizýshilerdiń máselesin sheshý úshin jıyn ótti.
Bıyl 19 mamyrda Jaısań shekara beketine «CarGoRuqsat» elektrondy kezegi engizildi. Pılottyq joba kezinde júrgizýshiler birneshe kedergige tap bolǵanyn aıtyp, oblystyq kásipkerler palatasynan kómek suraǵan.
— «CarGoRuqsat» elektrondy kezegi júk tasymaldaýshylardyń shekaradan ótýin jeńildetýi jáne jedeldetýi tıis edi. Alaıda is júzinde joba birqatar kedergige tap boldy. Alǵashqy aptanyń ózinde-aq 200-den astam tasymaldaýshy Aqtóbe oblysy kásipkerler palatasyna shaǵymdanyp, arnaıy WhatsApp-chat arqyly júıeniń durys jumys istemeıtinin jetkizdi. Negizgi shaǵym — elektrondy kezekke tirkelgen júk kólikteriniń jeńil kóliktermen birge kezek kútýi. Ótkizý beketinde kólik quraldaryn rettep, kirý tártibin anyqtaıtyn aqparattyq tablosy bar jınaqtaý alańy qarastyrylmaǵan. Mundaı jaǵdaı logıstıkada tártipsizdikke, kútý ýaqytynyń sozylýyna jáne bızneste operatsııalyq shyǵynnyń kóbeıýine ákelip otyr. Taǵy bir ózekti másele — kórsetiletin qyzmet sapasynyń tómendigi. Júıe aqyly bolǵanyna qaramastan kútýge arnalǵan aımaqtar, sanıtarlyq nysandar jáne kúnnen, jańbyrdan qorǵaıtyn qarapaıym alańdar máselesi oılastyrylmaǵan. Jol boıyndaǵy jóndeý jumystary jaǵdaıdy odan ári ýshyqtyryp otyr. Ótkizý qabileti shekteýli bolǵan soń jol polıtsııasy toppen alyp júredi. Bul ýaqyt sozyp, daý týýyna ákeldi, — dep habarlady Aqtóbe oblystyq kásipkerler palatasynyń baspasóz qyzmeti.
Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń kezekti otyrysynda birneshe usynys aıtyldy. Memlekettik kirister departamentine jol jóndeý jumystary aıaqtalǵanǵa deıin «CarGoRuqsat» júıesiniń jumysyn ýaqytsha toqtatý, sóıtip júk kólikterin ótkizý pýnkti mańynda jınalyp qalǵan nópirdi azaıtý joly aıtyldy. Sondaı-aq júıege tehnıkalyq aýdıt júrgizý jáne onyń jol jóndeý kezinde jumys isteýge daıyndyǵyn baǵalaý usynyldy. Ári júıege tirkelgen jáne tirkelmegen kólikterdiń (jeńil jáne júk kólikteri) aǵynyn bólý qajet ekeni aıtyldy.
— Mártók aýdanynyń ákimdigine jáne oblystyq memlekettik kirister departamentine júk kólikteri úshin arnaıy jınalmaly turaq salý múmkindigin qarastyrý usynyldy. «QazAvtoJol» jol polıtsııasymen birlesip, júk kólikterin ótkizý protsesin jeńildetý, memlekettik organdarmen birge kásipkerlerge túsindirý jumystaryn júrgizý, jóndeý júrip jatqan ýchaskeler boıynsha jol jabý syzbasyn kelisip, ony kásipkerlerge jetkizý usynyldy. Al oblystyq kásipkerler palatasy Jaısań ótkizý pýnktindegi jaǵdaıdy ári qaraı baqylaıdy jáne qajet bolsa qosymsha bastama kóteredi. Sonymen qatar Jaısań — Saǵarshyn shekarasyndaǵy ótkizý qabiletin arttyrý maqsatynda Orynbor oblysyndaǵy kásipkerlerdiń quqyqtaryn qorǵaý jónindegi ýákilmen birlese jumys isteý máselesi qarastyrylady, — dedi Aqtóbe oblystyq kásipkerler palatasynyń baspasóz qyzmeti.
Aıta keteıik, maýsym aıynan bastap Qazaqstan men Ózbekstan shekarasynda júk kólikteri úshin elektrondyq kezek júıesi engizile bastaıdy.