Aqtóbedegi jarylystan kelgen shyǵyndy kafeniń qojaıyny óteıtin boldy
AQTÓBE. KAZINFORM — Barlyǵy 13 páter men 4 kásipkerlik nysanyna zaqym kelgen. Shyǵynnyń bárin dámhana ıesi óteıdi.
Aqtóbe qalasy Altyn orda shaǵyn aýdanyndaǵy dámhanada gaz-aýa qospasy jarylyp, bes qabatty úıdiń bir kireberisi tolyq jabyldy. Qazir tehnıkalyq saraptama júrgizilip jatyr. Mamandar osy aptada qorytyndysyn shyǵarýy tıis.
— Kópqabatty úıdiń birinshi qabatynda ornalasqan 4 bıznes obektisine zaqym keldi. Terezeleriniń áınegi synǵan jáne basqa da materıaldyq shyǵyn keltirgenin. Olarǵa tehnıkalyq teksertý jáne baǵalaý usynyldy. Sonymen qatar, mamandar páterlerdi qarap shyǵyp, ıelerimen áńgimelesti. 13 páterdiń ıesi terezeleri synǵanyn jáne ózge de zaqym kelgenin aıtty. Naqty shyǵyndy anyqtaý úshin tehnıkalyq tekserý jáne baǵalaý mamandary shaqyryldy. Olar osy apta tehnıkalyq qorytyndysyn beredi. Tehnıkalyq baǵalaýdan keıin jarylys bolǵan dámhana ıesi páterlerge de, bıznes nysandarǵa shyǵyndy óteıdi. Tehnıkalyq baǵalaý jumystaryna ketken shyǵyndy da sol kásipker tóleıdi, — dep habarlady Aqtóbe qalasy ákiminiń baspasóz qyzmeti.
Osy oqıǵadan keıin Qylmystyq kodekstiń 292-baby 2-bóligi boıynsha is qozǵaldy. Zardap shekken eki adamnyń biri sol kúni úıine jiberilse, bireýi aýrýhanada em qabyldap jatyr.
— «Salam bro» kafesi órt qaýipsizdigi salasyndaǵy táýekel dárejesi tómen obektiler sanatyna jatady. Sondyqtan josparly tekserý júrgizilmeıdi. «Gaz jáne gazben jabdyqtaý týraly» Zańyna sáıkes gazben jabdyqtaý júıelerin paıdalaný salasyndaǵy memlekettik baqylaý jergilikti atqarýshy organdardyń quzyretine jatady. Gaz qyzmetiniń aqparatyna sáıkes, oqıǵadan keıin atalǵan turǵyn úıge gaz berý ýaqytsha toqtatylǵan. Gazben jabdyqtaý sol kúni keshki ýaqytta qaıta qalpyna keltirilgen, — dep habarlady Aqtóbe oblystyq TJD baspasóz qyzmeti.
Eske salsaq, ótken aptada Aqtóbedegi kafede gaz-aýa qospasy jarylyp, eki adam zardap shekti.