Aqtóbedegi jarylys: Kópqabatty úıdiń turǵyndaryna jataqhanadan bólme daıyndaldy

AQTÓBE. KAZINFORM - Ázirge tek 15 páterdiń turǵyndary ornalastyrylýy múmkin.

Aqtóbe qalasy Abaı dańǵyly boıyndaǵy 5 qabatty úı túgel oqshaýlandy. Qazir polıtsııa men TJD qyzmetkerleri páter ishin aralap, jarylystyń naqty qalaı, neden bolǵanyn anyqtaýǵa kiristi. Oblystyq TJD bastyǵy Qaharman Orazalın kelip, shuǵyl shtab quryldy. Qazir bul úıdiń turǵyndary túgel dalada júr.

- Úı turǵyndary úshin jataqhanadan 15 bólme daıyndalyp jatyr. Ázirge tek bir podezdegi 15 páterge oryn berý josparlanyp otyr. Mamandar qarap, teksergen soń naqtysy belgili bolady. Múmkin odan da kóp oryn qajet bolar, - dedi Aqtóbe qalasynyń ákimi Azamat Beket.

Oqıǵa ornynda birneshe órt sóndirý kóligi men jedel járdem brıgadasy tur.

- Saǵat 18:33-te jedel járdem stansasyna qońyraý tústi. Brıgada 7 mınýtta oqıǵa ornyna jetti. Ókinishke qaraı, bir adam jedel járdem kelgenge deıin qaza tapty. Barlyǵy 4 brıgada úıdiń janynda tur. Medıtsına qyzmetkerleri, onyń ishinde psıhologtar kómek kórsetti, - dedi Aqtóbe oblystyq Densaýlyq saqtaý basqarmasynyń basshysy Erlan Sultangereev.

Aıta keteıik, búgin keshkilik Aqtóbe qalasy Abaı dańǵylynda jarylys bolyp, bir adam qaza tapty. Jarylys qýattylyǵynyń myqty bolǵany sonshalyq, tereze 100 metr qashyq turǵan úıge ushyp, kólikterdi zaqymdandy. Sonymen birge qarsy turǵan úıdiń terezesi syndy.