Aqtóbedegi jarylys: Kópqabatty úıdegi 6 páter búlindi

AQTÓBE. KAZINFORM – Jarylys bolǵan úıdegi 4, 5, 6 podezde áli de jaryq óship tur. Turǵyndar týǵan-týysy men ákimdik daıyndaǵan jataqhanany panalady.

Aqtóbede jarylys bolǵan úıdiń jaramdy nemese apatty ekenin endi mamandar ǵana anyqtaıdy. Oblystyq TJD-niń qutqarýshylary keshe ıisshil ıtterdiń kómegimen úıdi túgel qarap, aralap shyqty. Mamandar 6 páterdiń búlingenin anyqtap otyr.

- Aldyn ala boljam boıynsha jarylys gaz-aýa qospasy, ıaǵnı, tabıǵı gazdan bolýy múmkin. Qazirgi kezde 73 adam evakýatsııalanǵan bolsa, onyń 10-y M.Ospanov atyndaǵy BQMÝ-niń №2 jataqhanasyna ornalasty, ózgesi týǵan-týystaryna ketti. Jarylys kezinde páterde 1 adam bolǵan. Qutqarýshylar ıisshil ıtpen birge aýmaqty túgel qarap shyqty, ol jerde basqa adam bolmady. Qazirgi kezde 6 páterge zaqym keldi. Ákimdik komıssııasy úı konstrýktsııasyn saraptap, naqty sheshimin aıtady. Úıdi tek saraptamadan soń ǵana apatty dep tanı alady. Qazir 4, 5, 6 podezderinde jaryq joq. Ol podezderde ázirge adam turmaıdy,- dedi oblystyq tótenshe jaǵdaılar departamenti memlekettik órt baqylaý basqarmasynyń bastyǵy Evgenıı Ovcharskıı.

Aıta keteıik, keshe Aqtóbe qalasy Abaı dańǵylyndaǵy kópqabatty úıde jarylys bolyp, artynsha páter órtendi. Tótenshe jaǵdaılar departamentinen 48 qyzmetker jáne 15 tehnıka, densaýlyq saqtaý salasynan 15 adam jáne 5 tehnıka, sondaı-aq dolıtsııa departamentinen 15 qyzmetker men 4 tehnıka jumyldyryldy.

Osy oqıǵadan soń Qylmystyq kodekstiń «Órt qaýipsizdigi talaptaryn buzý» baby boıynsha qozǵaldy.