Aqtóbedegi jańa sý qubyryna qaıtarylǵan aktıvter esebinen 5 mlrd teńge bólindi
ASTANA. KAZINFORM – Aqtóbe oblysyndaǵy Sarybulaq jer asty sýlary ken ornynan toptyq sý qubyryn salýǵa Arnaýly memlekettik qordan 5 mlrd teńge bólindi. Bul týraly Úkimettiń baspasóz qyzmeti habarlady.
Joba Memleket basshysynyń zańsyz shetelge shyǵarylǵan aktıvterdi qaıtarý jáne bul qarajatty eldiń damýyna baǵyttaý jónindegi tapsyrmasy aıasynda júzege asyrylyp otyr.
Bólingen qarajat Aqtóbe qalasynyń Batys-1, Batys-2 jáne Batys-3 shaǵyn aýdandaryn turaqty aýyz sýmen qamtamasyz etýge baǵyttalǵan. Atalǵan aýdandarda turǵyn úı qurylysy qarqyndy júrgizilip, kommýnaldyq jelilerge túsetin júkteme artyp keledi.
«Sarybulaq ken orny oblys ortalyǵynan 56 shaqyrym jerde ornalasqan. Joba aıasynda munda 20 artezıan uńǵymasy burǵylanyp, qajetti ınfraqurylymmen jabdyqtalady. Sondaı-aq toptyq sý qubyry salynyp, jeliler turǵyn úı alaptaryna deıin jetkiziledi. Qurylys jumystary bıyl bastalady», – delingen Úkimet habarlamasynda.
Joba iske asqannan keıin Aqtóbe qalasy, sondaı-aq Alǵa jáne Muǵaljar aýdandaryndaǵy eldi mekender táýligine qosymsha 70 myń tekshe metrge deıin aýyz sýmen qamtamasyz etiledi. Onyń ishinde oblys ortalyǵynyń qarqyndy damyp jatqan aýdandarynyń qajettiligi úshin táýligine 25 myń tekshe metr sý baǵyttalady.
Sarybulaq ken ornynyń barlanǵan qory óńirdi aldaǵy 30 jyl boıy turaqty aýyz sýmen qamtamasyz etýge jetkilikti.
«2024-2026 jyldar aralyǵynda Arnaýly memlekettik qor qarajaty esebinen Úkimet jalpy quny 610 mlrd teńgeni quraıtyn 500-den astam áleýmettik jobany qarjylandyrýdy maquldady. Onyń ishinde jalpy quny 226,5 mlrd teńgeni quraıtyn 267 joba sý ınfraqurylymyn damytýǵa baǵyttalǵan», – dep atap ótti Úkimettiń baspasóz qyzmeti.
Arnaýly memlekettik qor qarajaty áleýmettik jáne ınfraqurylymdyq jobalardy qarjylandyrýǵa baǵyttalyp keledi.
Aıta keteıik, óńirlerde jańa vokzaldar, sý qubyry, logıstıkalyq hab jáne turǵyn úıler paıdalanýǵa berildi.
