Aqtóbedegi jalǵyz soǵys ardagerine Prezıdent quttyqtaýy jetkizildi
AQTÓBE. KAZINFORM — Aqtóbe oblysyndaǵy jalǵyz soǵys ardageri Vasılıı Gretskıı qazir Hromtaý aýdanynda turady. Prezıdenttiń quttyqtaý hatyn oblys ákimi jetkizdi.
Ekinshi dúnıejúzilik soǵys ardageri buǵan deıin elimizdiń ońtústiginde turǵan. Búginde Hromtaý aýdanynyń turǵyny. Búgin ol turatyn úıdiń aýlasyna áskerı qyzmetshiler, quqyqqorǵaý organdarynyń, aýdan ákimdiginiń ókilderi, jergilikti turǵyndar jınaldy. Orkestr soǵys jyldaryndaǵy ánderdi oryndasa, mektep oqýshylary sap túzep, ardagerge qurmet kórsetti. Aqtóbe oblysynyń ákimi Ashat Shaharov Jeńis kúnine oraı, onyń páterine kúrdeli jóndeý júrgizýdi rastaıtyn sertıfıkat berildi. Ári Memleket basshysynyń quttyqtaýyn jetkizdi.
— Sizge taǵzym etý qurmet. Biz ashyq aspan men jarqyn bolashaq syılaǵan Sizderge árqashan alǵys aıtamyz, rızashylyq bildiremiz», — dedi Ashat Shaharov. Al Aqtóbe oblystyq ardagerler qoǵamynyń tóraǵasy Qajymuqan Satenov maıdangerge QR Qorǵanys mınıstri Rýslan Jaqsylyqovtyń atynan quttyqtady.
Aıta keteıik, Vasılıı Gretskıı 1924 jyly Belarýs elinde dúnıege kelgen. Soǵysqa deıin Jambyl oblysynda turǵan. 1942 jyly áskerge shaqyrylyp, bir jyldan keıin maıdanǵa jiberilgen. Ol Ýkraın jáne Belarýs maıdandarynda segizinshi polktiń birinshi atty ásker korpýsynyń quramynda soǵysqan. Úsh ret jaraqat aldy. Jeńisti Berlınnen 75 shaqyrym jerde ornalasqan aýrýhanada qarsy aldy. Osydan keıin olardyń polki Oral qalasynda ornalastyryldy. 1946 jyly alǵan jaraqattaryna baılanysty áskerden bosatyldy. Jaýyngerlik eńbegi úshin maıdanger «Qyzyl juldyz» jáne II dárejeli «Otan soǵysy» ordenderimen marapattaldy. Kóptegen áskerı nagradalary bar.
Aıta keteıik, Aqtóbe oblysynan ekinshi dúnıejúzilik soǵysqa 122 myńnan astam adam shaqyrylyp, onyń 36 myńnan astamy erlikpen qaza tapty. 35 aqtóbelik Keńes Odaǵynyń Batyry atansa, toǵyzy «Dańq» ordeniniń tolyq kavaleri boldy.