Aqtóbedegi úsh iri sý qoımasy kóktemgi tasqynǵa daıyndalyp jatyr

AQTÓBE. KAZINFORM – Aqtóbe, Qarǵaly, Sazdy sý qoımalary kóktemgi sý tasqynyna daıynalyp jatyr. Úsheýi 410-415 mln tekshe metr sý qabyldaı alady.

Aqtóbe sý qoımasynyń syıymdylyǵy - 245 mln tekshe metr. Qazirgi kezde munda shamamen 51 mln tekshe metr sý bar. Ózgesi jóndeý jumystary kezinde ózenge aǵyzyldy. 

- Byltyr «Qazsýshar» kásiporny Aqtóbe fılıalynyń kúshimen syıymdylyǵy 7,5 mln tekshe metr bolatyn Sazdy sý qoımasyna jóndeý jasaldy. Munda muzdan saqtaıtyn qorǵan salyndy. Óńirdegi eń úlken Qarǵaly sý qoımasynda da jóndeý jasaldy. Qorshaý salyndy, shlıýzdiń kóterme mehanızmi jańardy. Sonymen birge barlyq sý qoımasyn endi onlaın baqylap otyramyz. Sý qoımalaryna beınebaqylaý kameralary qondyryldy. Qazirgi kezde áli de sý qoımasyndaǵy sýdy jiberip jatyrmyz. Bul kóktemde sýdy qabyldaýǵa baǵyttalǵan shara,- dedi «Qazsýshar» RMK Aqtóbe fılıalynyń dırektory Rınat Shaýenov.

Onyń aıtýynsha, Aqtóbe sý qoımasyndaǵy jóndeý kezinde aǵyn sý jolyndaǵy tas deńgeıine deıingi sýdyń bári ózenge jiberildi. Sol kezde qoımady 55 mln tekshe metr ǵana sý qaldy. Qazirgi kezde de sekýndyna 0,5 tekshe metr sý jiberilip jatyr. Bul tasqynǵa qarsy kúres jumystary. Kóktemde úlken sý qoımasynyń biri 200 mln tekshe metr sý qabyldaýǵa daıyn.

- 2024 jyly Aqtóbe sý qoımasyna 550 mln tekshe metr sý keldi. Sý qoımasy bos turǵannyń ózinde eki ese kóp sý bul. Sondyqtan 2025 jyly sýdy neǵurlym kóp jiberip, qaýiptiń aldyn alý josparlandy,- dedi Rınat Shaýenov. Bıyl kóktemde osy úsh iri sý qoımasy 410-415 mln tekshe metr sý qabyldaı alady. 

Eske salsaq, 1988 jyly salynǵan Aqtóbe sý qoımasy bıyl jóndeldi.