Aqtóbedegi túzetý kabınetterinde erekshe qajettiligi balalardyń quqyǵy buzyldy

AQTÓBE. KAZINFORM — Prokýrorlar 80-nen astam balanyń quqyǵyn qorǵady. Erekshe balalardy túzetý kabınetterinde em-dom ýaqyty saqtalmaǵan, arnaıy quraldar der kezinde berilmegen.

Aqtóbe oblystyq prokýratýrasy erekshe qajettiligi bar balalardyń túzetý kabınetteri men bilim ordalaryn tekserdi. Tekserý kezinde birneshe buzýshylyq anyqtaldy. 

— Alǵa aýdanynda 75 múmkindigi shekteýli bala psıhologııalyq-pedagogıkalyq túzetý kabınetinde belgilengen 45 mınýttyń ornyna tek 35 mınýttan oqytylǵan. Múgedektigi bar balalardyń ata-analary men psıhologııalyq-pedagogıkalyq túzetý kabıneti arasyndaǵy kelisimsharttarda bala eki apta boıy sabaqqa kelmegen jaǵdaıda kelisimdi birjaqty buzýǵa bolatyndyǵy jóninde zańsyz normalar jazylǵan. Sonymen qatar apta saıyn sabaqqa kele almaıtyn balalar úshin qashyqtan túzetý sabaqtaryn ótkizý múmkindigi qarastyrylmaǵan, — dedi Aqtóbe oblysy prokýrorynyń kómekshisi Órken Eşanov.

Al Qarǵaly aýdanynda múgedektigi bar 13 bala tehnıkalyq kómekshi jáne arnaıy júrip-turý quraldaryn ala almaǵan. Prokýrorlyq qadaǵalaý aktisi negizinde erekshe qajettiligi bar 88 balanyń quqyǵy qorǵalyp, jaýapty laýazymdy tulǵalar tártiptik jaýapqa tartyldy.

Eske salsaq, Memleket basshysy jyl sońyna deıin erekshe balalarǵa jan-jaqty qoldaý kórsetetin zań ázirleýdi tapsyrdy.