Aqtóbedegi sotta turǵyn úı qoryndaǵy páterlerdiń qalaı zańsyz jekeshelendirilgeni anyqtaldy
AQTÓBE. KAZINFORM — Memlekettik aıyptaýshy sotta Aqtóbe qalalyq turǵyn úı qatynastary bóliminiń burynǵy basshysy Jandos Álimovti aıypty dep tanyp, 6 jyl 8 aıǵa bas bostandyǵynan aıyrýdy surady. Ol qyzmet etken jyldary baldyzy men tanystaryna kezekten tys páter berip, ony jekeshelendirýge kelisim bergen.
Aqtóbe qalalyq № 2 sotynda sottalýshy Jandos Álimovke qatysty is boıynsha jaryssóz ótti. Sot otyrysy barysynda aıyptaý aktisi de ózgergen. Buǵan deıin tek Qylmystyq kodekstiń 362-baby 4-bóligi 3-tarmaǵy boıynsha aıyp taǵylsa, oǵan 361-baby 4-bóligi 3-tarmaǵy qosyldy. Búgin sotta jaryssóz ótti. Prokýror sottalýshy Jandos Álimovtiń 2021-2022 jyldardaǵy zańsyz isterin tizbektedi.
— Jandos Álimov páterdi kezekpen berý týraly zań talaptaryn saqtamaǵan. Sóıtip páterlerdi zańsyz jekeshelendirýge jol berip, memleketke materıaldyq shyǵyn keltirgen. Máselen Aqtóbe qalalyq turǵyn úı qatynastary bóliminiń ınspektory qyzmetin atqarǵan kýáger «bıýdjettik sala qyzmetkeri» sanaty boıynsha 9939-y bolyp kezekte turǵan. Soǵan qaramastan páter alý úshin ótinish jasap, bul ótinish komıssııada qaralady. Komıssııa oń sheshim shyǵaryp, oǵan Aqtóbe qalasy Grıshın kóshesindegi úıden bólme qarastyrylady. Alaıda bólim qyzmetkeri bólingen bólmede turmady. Turýǵa jaramsyz bólmeni almastyrýdy surady. J.Álimov kezek saqtaý kerek degen zań talabyn buzyp, ótinishti qaıtadan komıssııada qaraýǵa ruqsat beredi. Taǵy da Grıshın kóshesindegi jataqhanadan bólme berýge sheshim qabyldandy. Alaıda sottalýshy 2021 jyly Altyn orda shaǵyn aýdanynan páter berýge sheshim qabyldaıdy. Páterge ıe bolǵan qyzmetker arada bir jyl ótkende 2,2 mln teńge tólep, páterdi jekeshelendirip alady, — dedi prokýror Sáken Bertileýov.
Dál osylaı 15 adamǵa páter kezekten tys, zańsyz berilgeni anyqtaldy. Olardyń arasynda sottalýshy Jandos Álimovtiń baldyzy, ózi qyzmet etken bólimniń mamandary men olardyń týystary, quqyq qorǵaý organdarynyń burynǵy qyzmetkerleri bar. Keıbiri birer aıda páterdi jekeshelendirip, keıin kóp uzamaı satyp jibergen.
— Jandos Álimovti Qylmystyq kodekstiń 361-baby 4-bóligi 3-tarmaǵy, 362-baby 4-bóligi 3-tarmaǵy boıynsha aıypty dep tanyp, túpkilikti 6 jyl 8 aı bas bostandyǵynan, ómir boıyna memlekettik qyzmette jumys isteý quqyǵynan aıyrýdy suraımyz. Jazany óteý orny qaýipsizdigi ortasha túzetý mekemesi dep qarastyrylsa, — dedi prokýror.
Sottalýshy taǵylǵan aıypty moıyndamady jáne óziniń memlekettik salada qyzmet etý quqyǵynan aıyrmaýdy surady.
Eske salsaq, is sotta tórt aı boıy qaraldy. Ár epızod boıynsha kýágerler shaqyryldy.
