Aqtóbedegi Sazdy ózeni arnasynan asyp jatyr
AQTÓBE. KAZINFORM – Aqtóbe qalasynyń ortasyndaǵy Sazdy ózeninde sel júrip, sý arnasynan asyp jatyr. Qalada tótenshe jaǵdaılar qyzmeti, áskerıler men polıtsııa, jergilikti atqarýshy organ ókilderi jumys istep jatyr.
Oqıǵa búgin tirkeldi. Tańnan bastap qalanyń qaq ortasymen ótetin Sazdy ózeninde sel qozǵalyp, sýdyń aǵyp ketýine kedergi keltirdi. Saldarynan ózen arnasynan asyp jatyr.
- Qalamyzdyń ortasynan ótetin Sazdy ózeninde muz keptelisteri qıyndyq týǵyzyp jatyr. Muz keptelisin joıý maqsatynda jergilikti atqarýshy organ, áskerı qyzmetkerler, TJD, polıtsııa qyzmetkerlerinen 157 jeke quram, 50-den asa tehnıka jumyldyryldy. Qalyńdyǵy – 40-50 sm. Birinshi kezekte ózendi muzdan tazalaý jumystary qolǵa alynyp jatyr. Baıqaǵanymyzdaı, ózen jaǵasynan sý tasyp jatyr. Qum, ınertti materıaldar úzdiksiz tasymaldanady. Áskerıler qapqa qum toltyryp, jaǵalardy bekitý jumystaryna kiristi,- dedi Aqtóbe oblystyq TJD bastyǵy Nurǵalı Júnisov.
Onyń aıtýynsha, sý Sazdy sý qoımasynan kelip jatyr. Qazir syıymdylyǵy 7,5 mln tekshe metr bolatyn sý qoımasy tolyp, dalalyqtan kelgen sý túgel osy ózen saǵasy kelip jatyr. Sý aǵyp, Elek ózenine quıýy tıis.
Aıta keteıik, qazir Aqtóbe qalasyndaǵy Mánshúk Mámetova kóshesi túgel jabyldy. Polıtsııa kezekshilik qoıyp, kólikter men qoǵamdyq kólikti ózge baǵytqa buryp jatyr.
Eske salsaq, buǵan deıin Aqtóbe oblysyndaǵy jaǵdaıǵa baılanysty BQO-da halyqaralyq jolda qozǵalys shektelgenin habarlaǵan bolatynbyz.
