Aqtóbedegi saıabaq basqanyń qolyna ótip, eski dúńgirshekter súrilmek

AQTÓBE. KAZINFORM – Aqtóbe qalasy ortalyǵyndaǵy saıabaq jazda senimgerlik basqarýǵa berilgen. Endi ol jerde turǵan saýda dúńgirshekterin ıeleri alyp ketýi tıis. Eger olar jınalmasa, súriledi.

Aqtóbe qalasynyń ákimdigi Tuńǵysh prezıdent atyndaǵy saıabaqty 10 jylǵa senimgerlik basqarýǵa berdi. Talap boıynsha saıabaqqa jańǵyrtý jumysy júrgizilýi tıis.

«Ortalyq saıabaq shildeden bastap 10 jylǵa senimgerlik basqarýǵa berildi. Ony konkýrstyq negizde «Praım park» JShS-i basqarýǵa aldy. Senimgerlik kelisimshart talaptary boıynsha saıabaqqa rekonstrýktsııa jasalady. Qazirgi kezde «Praım park» kompanııasy rekonstrýktsııa jumystaryn bastaýǵa kiristi. Ol úshin saıabaqta turǵan kıoskiler kedergi bolyp otyr. Sondyqtan jalǵa alýshylarǵa habarlandyrý bergen. Qazan aıynyń 28-ne deıin ıeleri dúńgirshekterdi alýy kerek. Saıabaq stıhııalyq saýda ornyna aınalmaýy tıis. Ártúrli dúńgirshekterdi boldyrmaý úshin arnaıy pavılondar alańyn salady. Kelesi maýsymda eski dúńgirshekter bolmaıdy»,- dedi Aqtóbe qalasy ákiminiń baspasóz qyzmeti.

Ákimdiktiń habarlaýynsha, jańǵyrtý jumystaryna bıýdjetten qarjy berilmeıdi, ony kompanııa jeke ınvestıtsııasyn salady.

Eske salsaq, bıyl jazda ortalyq saıabaqta quny 454 mln teńgeniń otty, lazerli sýburqaǵy qoldanysqa berildi. Elimizdegi biregeı jobaǵa qarjy bıýdjetten bólindi.